Qyzylordada unatqan qyzyn úsh jyl ańdyǵan jigit 500 myń teńge tólep, 25 táýlikke qamaldy

QYZYLORDA. QYZYLORDA – Qyzylorda qalasynyń №2 sotynda stalkıng deregi boıynsha ustalǵan sottalýshyǵa qatysty qylmystyq is qaraldy.

Oblystyq sottyń baspasóz qyzmeti taratqan málimetke súıensek, sottalýshy jábirlenýshige áleýmettik jeli jáne uıaly telefonyna habarlasyp, sezimin bildire bastaǵan.

- Alaıda, jábirlenýshiniń baılanys ornatýǵa nıeti joqtyǵyna, abonenttik nómirlerin buǵattap tastaǵanyna qaramastan mazasyn ala bergen. Qala berdi, turǵylyqty mekenjaıyna, jumys ornyna kóligimen qaıta-qaıta baryp, shyǵýyn talap etip, ańdyǵan. Osylaısha 2022 jyldan beri jábirlenýshini júıeli túrde ańdyp, stalkıng jasaǵan. Sot otyrysynda jábirlenýshi osy oqıǵanyń saldarynan qala aýmaǵynda emin-erkin júre almaı, basqa úıge kóshýge májbúr bolǵanyn kórsetip, sottalýshyǵa jaza qoldanýdy jáne moraldyq zııan óndirýdi surady, - delingen habarlamada.

Sot boıjetkenniń tynyshtyǵyn buzǵan jigitti Qylmystyq Kodekstiń 115- babynyń 1-tarmaǵymen 25 táýlikke qamaqqa alý jazasyn taǵaıyndady. Sondaı-aq ol jábirlenýshiniń paıdasyna 500 myń teńge moraldyq zııan óndirdi.

Eske salaıyq, Jazıra Qýanyshbaı esimdi qyzylordalyq qyz buǵan deıin ómirine qaýip tónip turǵanyn aıtyp, áleýmettik jelide jazba jarııalaǵan bolatyn. Buǵan baılanysty Qyzylorda oblystyq polıtsııa departamenti stalkıng deregi boıynsha qylmystyq is qozǵalǵanyn málimdedi.