Qyzylordada Ulttyq quryltaı otyrysyn uıymdastyrý jónindegi jumys toby qurylady

QYZYLORDA. KAZINFORM — Qyzylorda oblysynyń ákimi Nurlybek Nálibaev búgingi májiliste Ulttyq quryltaı otyrysyn uıymdastyrý jónindegi jumys toby qurylatynyn málimdedi.

Eske salsaq, Býrabaıda ótken IV Ulttyq quryltaıda Prezıdent Qasym-Jomart Toqaev «Bıyl el astanasyn Qyzylordaǵa kóshirý týraly tarıhı sheshimniń qabyldanǵanyna jáne halqymyzǵa «qazaq» ataýynyń qaıtarylǵanyna bir ǵasyr toldy. Mundaı mańyzdy oqıǵalar el jadynda saqtalýy tıis» deı kele, Ulttyq quryltaıdyń kelesi otyrysyn Qazaq eliniń astanasy bolǵan Qyzylorda qalasynda ótkizýdi usyndy.

Aımaq basshysy bul bastama barsha Syr jurtshylyǵyna artylǵan senim jáne abyroıly mindet ekenin atap ótti. 

— Quryltaıdyń kezekti otyrysyn «Alashtyń anasy» atanǵan qasıetti Syr óńirinde ótkizýdiń tarıhı turǵydan mańyzy zor. Daıyndyqqa osy bastan kirisip, quryltaıdy joǵary deńgeıde uıymdastyrýymyz kerek. Oblystyq qoǵamdyq damý basqarmasyna Ulttyq quryltaı otyrysyn uıymdastyrý jónindegi jumys tobyn qurýdy tapsyramyn. Jumys tobynyń quramyna oblys ákiminiń orynbasarlaryn, basqarma, departament basshylarymen qatar zııaly qaýym, azamattyq qoǵam ókilderin, tarıhshy ǵalymdardy qosý qajet. Top jumysyn úılestirý oblys ákiminiń orynbasary Shahmardan Baımanovqa júkteledi, — dedi oblys ákimi.

Buǵan deıin Ulttyq quryltaıdyń V otyrysy Qyzylordada ótetinin habarlaǵanbyz.