Qyzylordada ulttyq kıimderdiń sán úlgisi festıvali ótti
18 naýryz - Ulttyq kıim kúni aıasynda Qyzylorda qalasyndaǵy «Anaǵa taǵzym» ortalyǵynda «Etno Fashion» oblystyq sán úlgisi festıvali ótti.
Qyzylorda oblysynyń mádenıet, arhıvter jáne qujattama basqarmasynyń qoldaýymen ótkizilgen festıval maqsaty - ulttyq qundylyqtar men mádenı-murany nasıhattaý, jergilikti dızaıner-tiginshilerdiń kreatıvti klasterlik jańa júıesin qalyptastyryp, jumysyn qoldaý. Sondaı-aq, festıvalde ulttyq kıim túrlerin zaman talabyna saı etno stılde jańǵyrtyp, suranysqa qajet úlgileriniń jańa nusqasyn usyný nasıhattaldy.
Festıvalge 17 dızaıner-tiginshi qatysty. Ár dızaıner eki túrli kıim úlgisin usyndy. Biri - kúndelikti kıetin klassıkalyq stıldegi zamanaýı etno kıim úlgisi, ekinshisi – sahnalyq, sándi ulttyq kıim. Stıl men talǵamǵa qaraı, dızaınerler usynǵan ulttyq kıimder bir-birinen matasy men tigisi, bezendirilýi jaǵynan erekshelendi. Atap aıtsaq, olar shı quraqpen bezendirilgen etnoshapan, túımeleri jylqy súıekterinen ázirlengen zamanaýı keýdeshe, kıizden tigilgen shapan jáne ózge de dúnıelerge nazar aýdaryldy. Jergilikti dızaıner-tiginshilerdiń jumysyn ulttyq kıimder defılesinde 100-ge jýyq model qyz tanystyrdy.
Shara sońynda qatysýshylarǵa oblystyq mádenıet, arhıvter jáne qujattama basqarmasynyń «Alǵys» haty jáne matalar úıiniń arnaıy sertıfıkaty tapsyryldy.
