Qyzylordada UEFA standartyndaǵy jańa stadıon qurylysy aıaqtalýǵa jaqyn
QYZYLORDA. KAZINFORM — Qyzylorda qalasynyń sol jaǵalaýynda quny 20,9 mlrd teńgeni quraıtyn 11 myń oryndyq jańa stadıon salynyp jatyr, dep habarlaıdy oblystyń qoǵamdyq damý basqarmasy.
Memleket basshysy bıyl Býrabaıda ótken Ulttyq quryltaı otyrysynda halyqtyń sporttyq ınfraqurylymdarǵa qoljetimdiligin arttyrý maqsatynda oblys ortalyqtary men aýdandarda zamanaýı stadıondar men sport keshenderin salý máselesine erekshe toqtalǵan bolatyn.
Bul rette El Prezıdenti jáne Úkimettiń erekshe qoldaýymen aımaq basshysy Nurlybek Mashbekulynyń bastamasymen byltyr Qyzylorda qalasynyń sol jaǵalaýynda quny 20,9 mlrd teńgeni quraıtyn 11 myń oryndyq jańa stadıonnyń qurylysy bastalǵan bolatyn. Bas merdiger — «VD Stroı Injınırıng» JShS. Stadıonnyń jalpy aýdany — 19 942,9 sharshy metr.
Bul stadıon halyqaralyq standarttaryna saı salynyp jatqandyqtan álemdik dodalardy joǵary deńgeıde ótkizýge mol múmkindik beredi.
Biregeı nysanda jasyl alańnan bólek, olımpıadalyq sport túrlerine arnalǵan boks zaly, kúrestiń úsh túrine arnalǵan atap aıtqanda dzıýdo, grek-rım, erkin kúres zaly, fıtnes zaly, sporttyq gımnastıka, taekvondo jáne aýyr atletıka zaldary qamtylatyn bolady. Atalǵan sporttyq zaldar jyl on eki aı kóleminde sport súıer qaýym úshin sapaly qyzmet etetin bolady.
Jańa stadıonnyń taǵy bir ereksheligi — UEFA Klassıfıkatsııasy boıynsha ІІІ sanatty. Sonymen qatar, halyqaralyq deńgeıdegi «Felıps» kompanııasynyń ónimderi arqyly jaryqtandyrylatyn bolady. Bul óz kezeginde, túrli deńgeıdegi mádenı-sporttyq is-sharalardy jáne fýtbol matchtaryn joǵary deńgeıde ótkizýge mol múmkindik bermek. Budan bólek, jankúıerlerge arnalǵan «Qaısar» fýtbol klýbynyń jabdyqtaryn satatyn arnaıy dúken jáne dámhana qarastyrylmaq.
Stadıondaǵy jasyl alań oblystyń klımattyq ereksheligi eskerile otyryp, ozyq tehnologııalardyń kómegimen tóseletin bolady. Tıisinshe, jasyl alańǵa kerekti shıkizat kólemi damyǵan ozyq memleketterden ákelindi. Sondaı-aq, oıynshylarǵa qolaısyzdyq týdyrmaý maqsatynda fýtbol alańynyń astyńǵy qabatyna jylytý jelileri júrgizildi, budan keıin jasandy kógaldyń astyna 2 sm bolatyn «shockpad» amortızatsııalyq tósem qaptalady. Bul tehnologııa «Astana Arena» jáne Qyzylordadaǵy jańa stadıonda ǵana engizilgen. Osylaısha zamanaýı úlgide jabdyqtalǵan 11 myń oryndyq jańa stadıon halyqaralyq jarystardy ótkizýge tolyq múmkindik beredi.
Atalǵan nysandy osy jyldyń qyrkúıek aıynda paıdalanýǵa berý josparlanyp otyr.