Qyzylordada TJD-ǵa órt sóndirý kólikteri tabystaldy
QYZYLORDA. KAZINFORM - Qyzylorda oblysynyń ákimi Nurlybek Nálibaevtyń qatysýymen tótenshe jaǵdaılar departamentiniń jeke quramyna órt sóndirý avtokólikteriniń kiltin tabystaý rásimi ótip, qutqarý salasynyń qyzmetkerleri marapattaldy, dep habarlaıdy óńirlik ákimdiktiń baspasóz qyzmeti.
Saltanatty sharaǵa «Ónerkásipti damytý qory» AQ basqarma tóraǵasy Rınat Gapparov arnaıy kelip qatysty. Aımaq basshysy jınalǵan jurtshylyqty merekemen quttyqtap, tótenshe jaǵdaıdyń aldyn alý, adam ómirin qutqarý joǵary jáne jaýapty mıssııa ekenin atap ótti.
«Barshańyzdy jyl basy – Amal merekesimen jáne aldaǵy Naýryz meıramymen shyn júrekten quttyqtaımyn! Syr óńirinde keıingi jyldary maqsatty bastamalar qolǵa alynyp, aımaǵymyz qarqyndy damýda. Ekonomıkanyń barlyq negizgi kórsetkishterinde ósim bar. Qańtar-aqpan aılaryndaǵy áleýmettik-ekonomıkalyq damý kórsetkishteri boıynsha Qyzylorda oblysy óńirler arasynda alǵashqy orynnan kórindi. Oblystyń bıylǵy bıýdjeti 650 mlrd teńge bolyp bekitildi. Bul qarajat birinshi kezekte ózekti máselelerdi sheshýge, turǵyndardyń ómir súrý sapasyn arttyrýǵa baǵyttaldy. Búgin oblystyq bıýdjetten bólingen 1 mlrd. 900 mln. teńgege 14, respýblıkalyq bıýdjetten bólingen 266 mln. teńgege 3 órt sóndirý tehnıkasy tabystalýda. Bul – tótenshe jaǵdaılar salasyna úlken qoldaý. Qutqarý salasy qyzmetkerlerine óńir halqy atynan alǵys bildiremiz. Ylaıym, elimizde, týǵan jerimizde tótenshe jaǵdaı, apat bolmasyn dep tileımiz», – dedi Nurlybek Nálibaev.
Jıynda QR TJM Qurmetti ardageri, Qyzylorda oblysynyń Qurmetti azamaty Qorǵanbek Qaırýllaev sóz sóılep, áriptesterine sáttilik tiledi.
Keıingi jyldary óńirimizdegi barlyq salanyń materıaldyq-tehnıkalyq bazasyn nyǵaıtýǵa basymdyq berilýde. Qoǵamdyq kólik máselesin túbegeıli sheshý úshin 300 avtobýs, mektep oqýshylaryna 30 avtobýs, densaýlyq saqtaý salasyna 70 jedel járdem kóligi, ormanshylarǵa 95 tehnıka, veterınarııa salasynyń mamandaryna 30, quqyq qorǵaý organdaryna 92 qyzmettik avtokólik alyndy. Turǵyndar ıgiligine qyzmet etý úshin kommýnaldyq salaǵa da 42 tehnıka tabystaldy.
«Úlgili eldi meken» oblystyq baıqaýynyń jeńimpazdaryna kúndelikti el turmysyna eń qajetti degen zamanaýı úlgidegi 29 arnaıy tehnıka berildi. Oblys turǵyndarynyń suranysyna sáıkes bıyl barlyq eldi mekenderdegi medıtsınalyq uıymdarǵa 200 sanıtarlyq avtokólik alynady dep josparlanýda.
2022 jyly oblystyq bıýdjetten bólingen 54,3 mln.teńgege Aral aýdany Qamystybas eldi mekenine tez qurastyrmaly modýldi qutqarý stantsııasy alynyp ornalastyryldy. Ótken jyly 40 mln. teńgeden astam qarjyǵa 40-tan astam arnaıy qurylǵy (10 teplovızor, 15 sıgnalızator, 4 kompressor, 5 motopompa) alyndy.
Aldaǵy ýaqytta sol jaǵalaýǵa 4 shyǵysqa arnalǵan órt sóndirý deposyn, Aral aýdany Sekseýil kentine 2 shyǵysqa arnalǵan tez qurastyrmaly órt sóndirý deposyn salý kózdelgen.
Aıta keteıik, órt sóndirý kólikteri «Ónerkásipti damytý qory» AQ-nyń lınzıngtik baǵdarlamasy arqyly satyp alynǵan.
