Qyzylordada túzeý mekemesindegi 26 sottalǵan azamat otbasyn qurǵan

ASTANA. KAZINFORM – Qyzylorda oblysy boıynsha QAJ departamentiniń túzeý mekemelerinde 1 000-ǵa jýyq sottalǵan azamat jazasyn ótep jatyr. Bas bostandyǵynan aıyrylǵandar arasynda otbasyn qurǵandar da kezdesedi. Atap aıtqanda, 2024 jyldyń 6 aıynda 26 sottalýshy shańyraq kótergen.  

Jýyrda taǵy bir jazasyn óteýshi úılendi. Ol qaraqshylyq jáne kisi óltirý babymen 20 jylǵa sottalǵan. 

– Búgin men úshin qýanyshty kún. Otbasyly bolyp jatyrmyn. Іsti bolmaı turyp, ómirlik serigimmen dostyq qarym-qatynas ornatqanmyn. Bolashaqqa josparym kóp edi. Bizge mekemede túrli psıhologııalyq trenıngter ótkizedi. Osy trenıngterge qalmaı qatysamyn. Jumysym da bar. Mekemeniń óndiris aımaǵyndaǵy kirpish tsehynda eńbek etip júrmin. Jalaqymdy endi otbasyma jiberemin, - deıdi ol. 

№37 mekemesiniń zańgeri Jalǵas Esmahanovtyń aıtýynsha, túzeý mekemelerinde jazasyn óteýshiler nekege turý úshin zańgerlerden keńes alyp, ótinish jazady. Odan soń AHAT mamandary jazǵan ótinishteri negizinde, olardyń nekesin qıyp, neke kýálikterin tabystaıdy. 

– Bas bostandyǵynan aıyrý oryndarda neke qııý sottalǵandarǵa oń áser etedi. Sottalǵan otbasyly bolǵan soń, merziminen buryn bosatylyp shyǵýy úshin tártibin durystap, ómirge degen kózqarasy ózgeredi. Sondaı-aq qoǵamda óz ornyn tabýǵa jáne túzeý mekemesinen shyqqan soń otbasy aldyndaǵy jaýapkershilikti sezinedi. Ótinish bergen jazasyn óteýshiler arasynda uzaq jyl birge turyp, nekege turmaǵandar da kezdesedi, - deıdi Jalǵas Esmahanov.