Qyzylordada tutynýshylardan túsetin aryz-shaǵym 2,1 ese kóbeıdi
QYZYLORDA. KAZINFORM – Qyzylorda oblysy boıynsha saýda jáne tutynýshylardyń quqyqtaryn qorǵaý departamenti ótken jyly 129 kásipkerlik sýbektisinde Saýda qyzmetin retteý týraly zańnama talaby buzylǵanyn anyqtady.
Tekserý qorytyndysymen ákimshilik quqyqbuzýshylyq týraly kodeks talaptaryna sáıkes, olar ártúrli jaýapkershilikke tartyldy. 29 kásipkerge eskertý, 23-ine nusqama, 77 kásipkerge 1,4 mln teńge kóleminde aıyppul salyndy.
– Esepti kezeńde tutynýshylardyń quqyqtarynyń buzylýy týraly 910 ótinish kelip tústi. Bul 2024 jylmen salystyrǵanda 2,1 ese artyq, ıaǵnı ol kezdegi aryz-shaǵym sany 435 bolatyn. Taldaý barysynda baıqaǵanymyz, ótinishterdiń 61%-y bólshek saýda (sapasyz taýardy nemese 14 kún ishinde tıisti sapadaǵy taýardy aıyrbastaýdan, qaıtarýdan bas tartý, tutynýshylardy aldaý, sapasyz taýar usyný), 8,5%-y elektrondy saýda (tutynýshylardy aldaý, sapasyz taýar usyný, taýardy aıyrbastaýdan nemese qaıtarýdan bas tartý), 4,8%-y qoǵamdyq tamaqtaný (sapasyz tamaq ónimderi, jaramdylyq, saqtaý merzimi), 2,2%-y turǵyn-úı kommýnaldyq sharýashylyq qyzmet (kommýnaldyq qyzmet úshin tólemdi negizsiz esepteý, páter ıeleri kooperatıvteriniń tıisti deńgeıde qyzmet kórsetpeýi) salalaryn qamtydy. Ótinishterdi zańǵa sáıkes qaraý arqyly tutynýshylarǵa barlyǵy 21,2 mln teńge qarajaty qaıtaryldy, - dedi departament basshysynyń mindetin atqarýshy Nurlybek Bımyrzaev.
Departament qyzmetkerleriniń tekserýi nátıjesinde 59 naryq sýbektisine 0,6 mln teńge kóleminde aıyppul salyndy.
Buǵan deıin biz 2025 jyly 11 aıda Atyraý oblystyq saýda jáne tutynýshylardyń quqyǵyn qorǵaý departamentine 1500-ge jýyq ótinish túskenin jazǵan edik.