Qyzylordada turmystyq qaldyqtyń tek 32,8 paıyzy óńdeledi
QYZYLORDA. KAZINFORM — Bıyl 11 aıda Qyzylorda oblysynda 230 715 tonna qatty turmystyq qaldyq jınalǵan. Sonyń 75 630 tonnasy óńdeldi, bul degenimiz — nebári 32,8%.
Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, qoqys jınaý, tasymaldaý, suryptaý jáne óńdeý salasynda 17 kásipkerlik sýbektisi jumys isteıdi.
— Mysaly, «Smart Rubber» seriktestigi avtokólik shınalarynan rezeńke untaqtaryn nemese granýla shyǵarady. Al «Meırambek» jeke kásipkerligi makýlatýra, karton qaldyǵyn ájethana qaǵazyna aınaldyrady. Odan bólek makýlatýra, plastık, karton qaldyǵyn arnaıy qabyldaý pýnktinde qabyldap, suryptaıtyn kásipkerlik nysandary bar, — dedi basqarma basshysy Ǵalymjan Erkebaı.
Qoqysty suryptaý, óńdeý baǵytynda óńirde 99 mlrd 259 mln teńge esebinen 10 joba júzege asyrylyp jatyr. Onyń ishinde quny 98 mlrd 700 mln teńge bolatyn 9 jobany «Jasyl Damý» AQ qarjylandyrady.
— «Taza Qazaqstan» ekologııalyq baǵdarlamasyna turǵyndar belsendi atsalysyp keledi. Jyl basynan beri tazalyq aktsııalaryna 500 myńǵa jýyq adam qatysyp, 21 myń tonna qoqys shyǵardy, — dedi Ǵalymjan Erkebaı.
Búginde 145 eldi mekendegi 402 gektar jer polıgon qyzmetine arnalǵan. Sonyń 4,8%-y nemese jeteýiniń ǵana ekologııalyq jáne sanıtarlyq ruqsat qujattary bar.
Buǵan deıin biz Túrkistan oblysynda turmystyq qaldyq tastaıtyn polıgondar talapqa saı emes ekenin jazǵanbyz.