Qyzylordada turǵyndar asfaltsyz kóshelerge shaǵymdandy
QYZYLORDA. KAZINFORM – Qyzylorda qalasyndaǵy birqatar kósheniń turǵyndary asfaltsyz joldyń azabyn tartyp otyrǵanyn aıtyp, shaǵym bildirdi.
1 mamyr kóshesiniń aıaq jaǵynda turatyn turǵyn Threads áleýmettik jelisindegi jazbasynda kósheniń sapasy syn kótermeıtinin alǵa tartty. Onyń aıtýynsha, batpaqqa aınalǵan jolmen júrý qıyn. Tipti taksı júrgizýshileri mekenjaıdy taba almaı, tapsyrysty qabyldaýdan bas tartatyn jaǵdaılar bolyp turady.
– Qashan qalypty asfalt jol bolady? Taksıster mekenjaıdy tappaı, «adam tura ma?» dep suraıdy, – delingen jazbada.
Bul máselege qala ákimdigi jaýap berdi. Ákimdiktiń málimetinshe, bıyl qalanyń shet aımaqtaryndaǵy 72 kóshege asfalt tóselgen.
– Onyń ishinde ál Farabı shaǵyn aýdanyndaǵy 13 kóshege asfalt tóseldi. Al 1 mamyr kóshesine asfalt tóseý jumysy 2027 jylǵa arnalǵan josparǵa endi, – delingen habarlamada.
Sonymen qatar Tıtov qystaǵyndaǵy Jelkildek batyr kóshesiniń turǵyndary da joldyń jóndelýin asyǵa kútip otyr.
– Asfaltti qashanǵy kútip júremiz? Qashan tóseledi? Tıtovtyń barlyq kóshesinde asfalt, bizde ǵana joq, – delingen Instagram áleýmettik jelisindegi Krıtıka Qyzylorda paraqshasynda.
Qyzylorda qalalyq turǵyn úı-kommýnaldyq sharýashylyq bóliminiń habarlaýynsha, Jelkildek batyr kóshesi jóndeýdi qajet etetin kósheler tiziminde tur.
– Osyǵan sáıkes jobalyq-smetalyq qujattama ázirlenip, bıýdjetten qarajat suralady. Qajet qarajat bólingennen keıin tıisti jumys kezeń-kezeńimen atqarylady, – dep málimdedi atalǵan bólim.
Eske salaıyq, Astana qalasyndaǵy qoqys, búlingen jol nemese istemeıtin kóshe shamy týraly endi bir foto arqyly habarlaýǵa bolady. TazaQazBot chat-boty arqyly túsken 24 myńnan astam ótinishtiń 91,8%-y oryndalǵan.