Qyzylordada túngi klýbta adamdy eseńgiretetin azot oksıdi satylǵan
QYZYLORDA. KAZINFORM - Qyzylorda oblysynda polıtseıler túngi klýbta adamdy eseńgiretetin azot oksıdin satý deregin anyqtady.
Áleýmettik jelide Qyzylorda qalasynda túńgi klýbta azot oksıdi quıylǵan sharlar ashyq satylyp jatqan týraly aqparat taraǵan edi.
- Oblystyq Polıtsııa departamentiniń esirtki qylmysyna qarsy is-qımyl basqarmasynyń qyzmetkerleri túngi klýbqa reıd júrgizdi. Nátıjesinde ol jerden 2 dana 10 lıtrlik gaz ballony anyqtaldy. Oǵan qosa polıetılen paketine salynǵan sharıkter, «kalıan» apparaty zattaı dálel retinde alyndy. Osyǵan baılanysty QR Qylmystyq kodeksi 310-babynyń 1-bóligi boıynsha sotqa deıingi tergep-tekserý áreketi bastaldy. Onda dárilik nemese basqa da quraldardy paıdalanyp eseńgiretý úshin prıtondar uıymdastyrý nemese olardy ustaý jaǵdaıy kórsetilgen, - dep málim etti Qyzylorda oblystyq polıtsııa departamentinen.
Vedomstvo málimetinshe, polıtseıler qoǵamdaǵy tártip pen tynyshtyqty qadaǵalaý baǵytynda naqty jumystar júrgizip keledi. Demalys kúnderi qalada kúsheıtilgen rejımde árbir oıyn-saýyq ortalyǵyna tekserý júrgiziledi.
Eske salsaq, budan buryn Qyzylorda oblysynda negizsiz alynǵan 150 mln teńge sýbsıdııa qaıtaryldy.