Qyzylordada toı kortejinde jol erejesin buzǵandarǵa aıyppul salyndy
QYZYLORDA. KAZINFORM — Qyzylorda oblystyq polıtsııa departamenti jedel basqarý ortalyǵynyń qyzmetkerleri túngi ýaqytta jol erejesin óreskel buzyp, qala aýmaǵynda avtokólik kortejin uıymdastyrǵan júrgizýshilerdi anyqtady.
Oqıǵa túnde Qyzylorda qalasynyń ortalyǵynda bolǵan.
— Beınebaqylaý kameralary arqyly birneshe avtokóliktiń kortej uıymdastyryp, jol qozǵalysy erejelerin buzyp júrgeni anyqtalǵan. Bul týraly aqparat dereý jaqyn mańdaǵy patrýldik polıtsııa ekıpajyna berildi. Oqıǵa ornyna jetken polıtseıler kólik júrgizýshilerine toqtaý týraly zańdy talap qoıǵan. Alaıda keıbiri talapqa baǵynbaǵan. Osyǵan baılanysty qosymsha patrýldik polıtsııa ekıpajy jumyldyrylyp, keshendi is-shara júrgizdi. Nátıjesinde quqyq buzǵan júrgizýshilerdiń barlyǵy toqtatyldy, — delingen habarlamada.
Olarǵa qatysty jol erejesin elemeý, manevr jasaý talaptaryn saqtamaý, jol qozǵalysyna qatysýshylarǵa avarııalyq jaǵdaı týǵyzý, qaýipsizdik beldigin taqpaı kólik basqarý, sondaı-aq kólik quralyna arnaıy jaryq sıgnaldaryn berýge arnalǵan qurylǵylardy ornatý tártibin buzý faktileri tirkeldi. Nátıjesinde 9 quqyq buzýshyǵa qatysty ákimshilik hattamalar toltyrylyp, zańnamada kózdelgen tártippen aıyppul salyndy. Bir avtokólik arnaıy turaqqa qoıyldy.
Sonymen qatar quqyq buzýshylarǵa mundaı áreketterge jol bermeý týraly resmı eskertý jasaldy.
Buǵan deıin de oblys ortalyǵynda birneshe júrgizýshiniń qala aýmaǵynda orynsyz kortej uıymdastyrǵany anyqtaldy.
