Qyzylordada toı kortejinde jol erejesin buzǵandardyń kim ekeni belgili boldy
QYZYLORDA. KAZINFORM – Qyzylorda oblysynda jol qozǵalysy erejesin óreskel buzyp, qarsy baǵytqa shyǵyp, avarııalyq jaǵdaı týǵyzǵan jáne jol boıynda pırotehnıkalyq quraldar paıdalanǵan toı kortejiniń qatysýshylary anyqtaldy.
Buǵan deıin habarlaǵanymyzdaı, quqyqbuzýshylyq 23 tamyzǵa qaraǵan túni Jańaqorǵan aýdanynda bolǵan.
- Barlyq qatysýshy anyqtalyp, polıtsııaǵa jetkizildi. Olar — 21 men 35 jas aralyǵyndaǵy Jańaqorǵan aýdanynyń, Almaty jáne Jambyl oblystarynyń, sondaı-aq Shymkent qalasynyń turǵyndary. Jaýapkershilikke tartylǵandardyń arasynda 13 júrgizýshi jáne 2 jolaýshy bar. Barlyǵy zańda belgilengen tártippen jaýapkershilikke tartyldy, - dep habarlady oblystyq polıtsııa departamenti.
Quqyq buzýshylarǵa qatysty 56 ákimshilik is qozǵaldy. Olar qarsy baǵytqa shyǵý, avarııalyq jaǵdaı týǵyzý, qaýipti manevr jasaý, kólik quralyn júrgizý quqyǵynsyz jáne tehnıkalyq aqaýy bar avtokólikti basqarý, usaq buzaqylyq jasaý, sondaı-aq eldi meken aýmaǵynda pırotehnıkalyq quraldardy zańsyz paıdalaný derekteri boıynsha jaýapkershilikke tartyldy.
- Sot sheshimimen 3 júrgizýshi kólik quralyn basqarý quqyǵynan aıyryldy. Qatysýshylardyń birine 5 táýlikke ákimshilik qamaý jazasy taǵaıyndaldy. Qalǵandaryna ákimshilik aıyppul salyndy. 5 avtokólik arnaıy turaqqa qoıyldy. Barlyq qatysýshyǵa mundaı áreketterge jol bermeý týraly resmı eskertý berildi, - delingen habarlamada.
Tártip saqshylary toı kortejderiniń jolda eshqandaı artyqshylyǵy joq ekenin, zań talaptaryn óreskel ári demonstratıvti túrde buzǵan árbir adam zańda kózdelgen jaýapkershilikke tartylatynyn eskertti.
Quqyqbuzýshylyq áleýmettik jelige monıtorıng júrgizý kezinde anyqtalǵan edi.
