Qyzylordada tólem tártibin buzǵandar 126,3 teńgeni bıýdjetke qaıtardy
QYZYLORDA. KAZINFORM – Byltyr Qyzylorda oblysynda 85 aýdıtorlyq is-shara júrgizilse, sonyń 78-i boıynsha qarjylyq quqyq buzý derekteri anyqtaldy.
Oblystyq ishki memlekettik aýdıt departamentinen habarlaǵandaı, oǵan jol bergen bilim, qurylys, densaýlyq saqtaý jáne taǵy basqa salalardyń jaýapty qyzmet ıeleri tártiptik jaýapkershilikke tartyldy.
– Aýdıt obektileriniń 189 laýazymdy ókiline qatysty 455 ákimshilik hattama toltyryldy. Bıýdjet qarajatyn urlaý, artyq aýdarý faktileri bar 10 aýdıt materıaldary oblystyq prokýratýraǵa joldandy. Qadaǵalaýshy organ buǵan baılanysty protsessýaldy sheshim qabyldaıdy.
Quqyq qorǵaý organdary 6 aýdıt materıaldary boıynsha qylmystyq kodekstiń 189-baby, ıaǵnı senip tapsyrylǵan bóten múlikti ıemdenip alý nemese talan-tarajǵa salý faktisi boıynsha qylmystyq is qozǵady. Tergeý-tekserý qorytyndysymen 6 istiń qujattary sot qaraýyna joldandy, - dedi departament basshysy Erbol Kúzembaev.
Aımaqta bıýdjet qarajatynyń tıimdi, ashyq jáne maqsatty paıdalanylýyna onlaın monıtorıng júrgiziledi.
– Alǵashynda onlaın monıtorıng bilim salasy qyzmetkerleriniń eńbekaqy tólemderine júrgizildi. 2025 jyldan bastap densaýlyq saqtaý, sport jáne medıtsına salasynyń qyzmetkerleri qamtyldy. Nátıjesinde 482 tólem boıynsha tártiptiń buzylǵany anyqtaldy.
Bıýdjetke jáne uıymdarǵa 126,3 mln teńge qaıtaryldy, - dedi departament basshysy.
Buǵan deıin ótken jyly Qyzylorda oblysynyń memlekettik eńbek ınspektorlary tekserý nátıjesinde 348 zańbuzýshylyqty anyqtaǵanyn jazǵan edik.