Qyzylordada tolassyz jaýynnan qala kóshelerin sý basyp qaldy
QYZYLORDA. KAZINFORM - Qyzylordada kesheden beri tolassyz jaýǵan jaýynnan qala kóshelerin sý basyp qaldy.
Oblys ortalyǵynda eki kúnnen beri nóser jaýyn jaýyp tur.
Saldarynan qaladaǵy keıbir kóshelerdi sý basyp, búkil kommýnaldyq qyzmetter kúsheıtilgen rejımde jumys isteýde.
Bul jóninde Qyzylorda qalasynyń ákimdigi tómendegishe túsinik berdi.
«Kesheden beri toqtaýsyz jaýǵan jańbyrdyń sýyn tartý sharalary júrgizilip jatyr. Aıaldama, kóshe boıy, aýlalarǵa arnaıy tehnıkalar jiberildi. Jınalyp qalǵan jańbyr sýy alynýda», — dep málim etti ákimdikten.
Al Qyzylorda oblysynyń tótenshe jaǵdaılar departamenti órt sóndirý jáne avarııalyq-qutqarý jumystary qyzmeti 1 sý tartý motopompasyn paıdalanyp, 5 qyzmetker kóshede jınalǵan jańbyr sýynan tazartý jumysyna jumyldyrylǵan.
Nátıjesinde Nazarbaev pen Ábdiraıymov kóshesiniń qıylysynda tolassyz jaýyn saldarynan jınalǵan 40 tekshe metr sý tartylǵan.
«Qazgıdromet» RMK Qyzylorda oblysy boıynsha fılıalynyń bólim basshysy Aıgerim Jókelovanyń aıtýynsha, jańbyr búgin keshke deıin sozylady.
Erteńnen bastap kún qabaǵy ashylady.
Eske salsaq, budan buryn Túrkistan oblysynda qatty nóserden eki kópirdi sý shaıyp ketken edi.
