Qyzylordada tok soǵyp kóz jumǵan balanyń otbasy ádildik suraıdy
QYZYLORDA. KAZINFORM - Qyzylorda qalasynda bes aı buryn dúken janyndaǵy muzdatqyshtyń elektr togyna túsip, balasy qaıtys bolǵan Erýbaevtar otbasy quqyq qorǵaý organdarynan ádil sheshim shyǵarýdy suraıdy.
Oqys oqıǵa 2024 jyldyń 19 tamyzynda bolǵan. Sol kúni keshke taman balalarmen jasyrynbaq oınap júrgen 11 jastaǵy Danııar dúken janynda turǵan muzdatqyshtyń qasyna tyǵylyp qalýǵa árekettenedi. Ol ýaqytta muzdatqyshtyń aınalasynda eshqandaı qorshaý bolmaǵan.
- Oqıǵa bolǵan kezde bul jerde qamys ósip turǵan. Muzdatqyshtan sýdyń tamshylap turǵanynan jer balshyq bolǵan. Balshyqtan balanyń aıaǵy taıǵanap, muzdatqyshtyń symyn ustap qalǵan sekildi. Artynan kelgen balalar onyń qulap jatqanyn kórgen. Sodan keıin dereý meni shaqyrtty. Danııar bes kún boıy balalar aýrýhanasynda jan saqtaý bóliminde jatty. Esin bilmegen kúıi bes kúnnen keıin kóz jumdy. Dárigerler balanyń tokqa túskenin rastady. Ony sol qolymen ustap alǵanyn jetkizdi. Oqıǵanyń bolǵanyna bes aıǵa jýyqtady. Ázirge qylmystyq istiń jyljıtyn túri joq. Tipti, ol sotqa jetpesten qysqaryp kete me degen qaýpimiz de joq emes. Bul istiń ádil sheshilgenin talap etemiz, - dedi Janar Lápbaeva.
Balanyń ákesi Rýstam Erýbaev sol oqıǵadan keıin de dúkenniń áli jumys istep turǵanyn jetkizdi. Oǵan eshkim shekteý jasamaǵan. Oqıǵadan keıin dúken ıesi muzdatqyshtyń aınalasyna juqa tor symmen qorshaý júrgizgen.
- Ózińiz kórip turǵandaı, bul symnyń ózi adam qaýipsizdigine eshqandaı jaýap bere almaıdy. Negizinde dúkenniń aınalasyna arnaıy qorshaý jasalyp, adamdardyń qaýipsizdigine mańyz berilýi qajet dep oılaımyn. Buǵan qatysty zańger mamandardan keńes alǵan edik. Olardyń barlyǵy muzdatqyshqa arnaıy qorshaý jasalýy qajettigine nazar aýdardy. Dúken ıesi aldymyzǵa keshirim surap kelgen de joq. Men polıtseılerdiń buǵan qatysty jumysyna qanaǵattanbaımyn. Balamnyń isi 27 jeltoqsanda jabylyp, ol 30-y kúni qaıtadan ashylǵan. Árıne, bizde qazir advokat jaldaýǵa qarjy tapshy bolyp tur. Dese de bul isti aıaqsyz qaldyrmaımyn, - dedi ol.
Oblystyq polıtsııa departamenti buǵan qatysty qylmystyq isti tergeý áli de jalǵasyp jatqanyn atap ótti. Ol boıynsha QR Qylmystyq kodeksiniń meggilsiz ólim deregi boıynsha is qozǵalyp, qazirgi tańda tergep-tekserý amaldary júrgizilip jatyr. Qylmystyq is boıynsha tıisti saraptama taǵaıyndalǵan. Odan bólek qylmystyq is boıynsha tıisti organdarǵa suranys hat joldanyp, olardyń tarapynan tıisti jaýaptar alynyp jatyr.
Eske salsaq, budan buryn qyzylordalyq polıtseıler turǵyn úıden 6 mln teńgeni urlap ketken kúdiktini ustady.