Qyzylordada toq soǵyp qaıtys bolǵan balanyń týystary tergeýdiń sozylyp ketkenine shaǵymdandy
QYZYLORDA. KAZINFORM – Toǵyz aı buryn balasy dúken janyndaǵy jeldetkishtiń elektr toǵyna túsip qaıtys bolǵan qyzylordalyq Erýbaevtar otbasy áli kúnge ádildik izdep shyryldap júr.
Oqıǵanyń jaı-japsaryn jábirlenýshiniń anasy Janar Lápbaeva aıtyp berdi.
– 11 jastaǵy ulym Danııar 2024 jyly 19 tamyz kúni keshki saǵat toǵyz shamasynda úıge ertip kelgen dosyn shyǵaryp salmaq bolyp dalaǵa shyǵyp ketken. Arada 15-20 mınýt ótkende 15 jastaǵy úlken ulym «mama, kósheniń bas jaǵyna kelińizshi, Danııar es-tússiz jatyr» dep qońyraý soqty. Júgirip shyqsam, balany dúkenniń janynan kóterip ákep, sol jerge jatqyzǵan eken. Qasyna jetip bardym. Es-tússiz. Jedel járdem shaqyrǵanymyzben kelgen joq. Jolaı ótip bara jatqan kólikti toqtatyp, sonymen oblystyq balalar aýrýhanasyna apardyq. Keıin surastyryp bilgenimdeı, Danııar dosyn shyǵaryp salǵasyn kórshi balalarmen jasyrynbaq oınapty. Bári jan-jaqqa qashqanda bul qýysqa tyǵylǵan. Dál jeldetkishtiń tusy. Sonyń sýy tamshylap aǵyp, túsken jeri balshyqqa aınalǵan. Ornynan turmaq bolǵanda aıaǵy taıǵanap ketip, kondıtsıonerdiń symyn ustap qalyp, toq urǵan. Oǵan sol jerdegi aıaq izderi dálel. Birge oınaǵan balalar izdep tappaǵan. Tek úlken ulym kórip qalyp, meni kómekke shaqyrǵan, – dedi ol.
Danııar bes kún oblystyq balalar aýrýhanasynyń jan saqtaý bóliminde es-tússiz jatyp, 2024 jyldyń 24 tamyzynda kóz jumǵan. Balanyń sol qolymen toqty ustap qaıtys bolǵany sot-medıtsına saraptamasynyń qorytyndysynda kórsetilgen. Sol kúni qylmystyq is tirkelgen.
Janar Lápbaeva sonyń sotqa jetpengenine alańdaýly. Sozbalańǵa salyp júrgende isti jaýyp tastaı ma degen qorqynyshyn da jasyrmady.
– Osyǵan deıin birneshe tergeýshi aýysty. Qaı-qaısysynyń aldyna barsań da «aǵa-kókelep», bárin qatyratyn etip shyǵaryp salady. Keıin bir jaýabyn bilgim kelip qońyraý shalsam, tutqany kótermeıdi ne habarlamama jaýap bermeıdi. Tergeýshi birde bul istiń sotqa barý-barmaýy ekitalaı ekenin aıtqan. Tipti bir ret – byltyr 27 jeltoqsanda jabylyp, 30 jeltoqsan kúni ózim qaıtadan qylmystyq is ashtyrǵanmyn. Sot-medıtsına saraptama qorytyndysy qolymda. Tipti balamnyń toqty ustaǵan sáti túsirilgen vıdeo bar. Quzyrly organdarǵa qansha aryzdansam da qozǵalys joq, – dedi Janar Lápbaeva.
Ol ulynyń ólimi jeldetkishtiń syrtyna qorshaý qoıylmaýynan, dúken ıesiniń buǵan nemquraıly qaraýynan boldy dep esepteıdi.
«Iesi aldymyzǵa bir ret te keshirim surap kelgen joq. Jumysyn áli jalǵastyryp jatyr» degen jábirlenýshiniń anasy qylmystyq istiń tezirek sotta qaralyp, kináli tarap jazaǵa tartylǵanyn qalaıdy.
Biz bul másele boıynsha jaýapty oryndarǵa resmı saýal joldaǵanbyz. Qyzylorda oblystyq polıtsııa departamenti isti qalalyq polıtsııa basqarmasy sotqa deıingi tergep-tekserýdiń biryńǵaı tizimine engizgenin málimdedi.
– Qylmystyq is boıynsha jan-jaqty jáne obektıvti túrde tergep-tekserý júrgizilip jatyr. Nátıjesine sáıkes zańdy túrde protsestik sheshim qabyldanady. Qylmystyq protsestik kodekstiń 201-babynyń talabyna sáıkes qylmystyq is júrgizý barysy tergeý qupııalylyǵyna baılanysty jarııalanbaıdy, – dedi Qyzylorda oblystyq polıtsııa departamenti bastyǵynyń orynbasary Amangeldi Dosjanov.
Qyzylorda oblystyq prokýratýrasynyń resmı jaýabynda da tergep-tekserý týraly málimet egjeı-tegjeı jarııalanbaıtyny kórsetilgen.
– Atalǵan derek boıynsha 2024 jyly 24 tamyzda Qyzylorda qalalyq polıtsııa basqarmasy adam ólimi deregi boıynsha qylmystyq is tirkep, tergep-tekserý bastalǵan. Іs boıynsha prokýratýranyń nusqaýyna sáıkes búgingi kúni tergep-tekserý amaldary júrgizilip jatyr. Bul másele prokýratýranyń baqylaýynda, – dedi Qyzylorda oblysy prokýrorynyń orynbasary Mádı Sarpekov.
Eske salsaq, buǵan deıin balanyń ákesi Rýstam Erýbaev sol oqıǵadan keıin de dúkenniń áli jumys istep turǵanyn jetkizgen edi. Oǵan eshkim shekteý jasamaǵan. Oqıǵadan keıin dúken ıesi jeldetkishtiń aınalasyna juqa tor symmen qorshaý júrgizgen.