Qyzylordada toǵyzqumalaqshylar tuńǵysh ret jasandy ıntellektpen synǵa túsip jatyr
QYZYLORDA. KAZINFORM — Qyzylorda qalasynda halyqaralyq-reıtıngtik týrnır aıasynda memleket jáne qoǵam qaıratkeri Nálqoja Ergeshbaevty eske alý maqsatynda toǵyzqumalaqtan tuńǵysh ret «Champion» týrnıri ótip jatyr. Bul týraly oblystyq dene shynyqtyrý, sport jáne týrızm basqarmasynyń baspasóz qyzmeti habarlady.
Oǵan Qyrǵyzstan Respýblıkasy men elimizdiń túkpir-túkpirinen sportshylar keldi.
— 2008 jyly bastalǵan jarys álemdik deńgeıdegi chempıondardyń sheberhanasyna aınaldy. Ony týrnırdiń tarıhynan anyq kórýge bolady. 2017 jyly alǵash ret halyqaralyq deńgeıge kóterildi. 2020 jyly jarys aıasynda tuńǵysh ret Azııa kýbogi uıymdastyryldy. Úzdik sportshylar bıyl tuńǵysh ret jasandy ıntellektpen synǵa túsedi. JI toǵyzqumalaqshynyń deńgeıi halyqaralyq sport sheberiniń deńgeıimen birdeı. Onyń avtory — joǵary tehnologııalyq JI baǵdarlamasyn ázirleýshi Abylaı Nurske esimdi astanalyq azamat, — dedi týrnırdiń bas tóreshisi, Qazaqstanǵa eńbegi sińgen sport sheberi Hakimjan Eleýsinov.
Bul júıe ulttyq oıyn erejelerin meńgerip, qarsylas oıynshynyń áreketine qaraı jaýap qaıtara alady. Mamandar ony buǵan deıin tarıhı jetistik retinde baǵalap úlgerdi.
Týrnır barysynda aldaǵy halyqaralyq jáne respýblıkalyq jarystarǵa qatysatyn úzdik sportshylar anyqtalady. Jarys qorytyndysy 6 naýryz kúni belgili bolady.
Buǵan deıin Astanada «Zań jáne tártip» qaǵıdaty aıasynda Qazaqstan Respýblıkasynyń Táýelsizdik kúnine oraı mektep oqýshylary, jasóspirimder, jastar men ardagerler arasynda toǵyzqumalaqtan qalalyq týrnır uıymdastyrylǵan bolatyn.