Qyzylordada TikTok-ta zańsyz oıyn uıymdastyrǵan ekeý endi kóshe sypyrady
QYZYLORDA. KAZINFORM — Qyzylordada áleýmettik jelide zańsyz oıyn uıymdastyrǵan eki adam sottaldy.

Bul baǵytta Qarjylyq monıtorıng agenttiginiń Qyzylorda oblysy boıynsha departamenti jedel izdestirý sharalaryn júrgizdi. Nátıjesinde áleýmettik jelide zańsyz oıyn uıymdastyrǵan eki adamnyń jolyn kesti.
Kúdiktiler 2023 jyldyń qyrkúıek aıynan bastap TikTok áleýmettik jelisi arqyly jeli qoldanýshylary arasynda «Zarık» zańsyz qumar oıynyn oınatqan.
Bás tigý mólsheri 3 000 teńge jáne odan joǵary somada bolǵan. Qarjyny kúdiktiniń biri óziniń qylmystyq oıynan beıhabar ákesi men anasy, áıeliniń esepshotyna qabyldap otyrǵan.
«Sottalýshylar 2023 jylǵy 1 qyrkúıek pen 2024 jylǵy 28 mamyr aralyǵynda 12 031 371 teńge iri mólsherde tabys tapqan. Tergeý barysynda kúdiktiniń biriniń úıine tintý barysynda 5 uıaly telefon, 1 kalkýlıator, ústel betinen oıynshylardyń tizimi jáne akkaýnttar jazylǵan paraqtar tabyldy. Sondaı-aq TikTok jazýy bar 2 qaýashaq, oıyn kartasyn taratý apparaty jáne ózge de zattar tárkilendi. Qylmystyq quqyq buzýshylyq jasaǵany úshin eki adamnyń Qylmystyq kodekstiń 307-baby 2-bóligi 2,3-tarmaǵymen múlkin tárkileýsiz 2 jyl 6 aı merzimge bas bostandyǵy shektelip, 100 saǵat májbúrli eńbekke tartý jazasy taǵaıyndaldy», — dep málim etti QR Qarjylyq monıtorıng agenttiginiń Qyzylorda oblysy boıynsha departamentinen.
Eske salsaq, budan buryn Qyzylorda oblysynda qylmystyq toptan 1,5 tonnadan astam esirtki tárkilendi.