Qyzylordada tehnıkalyq reglamentke saı tańbalanbaǵan ónimder saýdadan alyndy

QYZYLORDA. KAZINFORM – Tehnıkalyq retteý jáne metrologııa komıtetiniń Qyzylorda oblysy boıynsha departamentinde ótken jyly 3 ákimshilik is qaraldy. 1 mln 288 myń teńgege jýyq aıyppul bıýdjetke óndirildi. 39 jeke menshik medıtsınalyq ortalyq jáne zerthanaǵa ólshem birligin qamtamasyz etý týraly zań talaptarynyń buzylýy boıynsha usynystar berildi.

- «QazCem» tsement jáne beton óndirýshiler assotsıatsııasynan tehnıkalyq reglamentter men normatıvtik quqyqtyq aktilerde belgilengen talaptarǵa sáıkes kelmeıtin tsement ónimi týraly aryz tústi. Aryzǵa sáıkes «Alı-Asqar Qurylys» seriktestiginde jospardan tys tekserý júrgizildi. Nátıjesinde ákimshilik is qozǵalyp, 383 myń teńgeden astam aıyppul salynyp, tańbalanýy boıynsha tehnıkalyq reglamentke saı kelmeıtin tsement ónimin satýǵa tyıym salyndy. Janar-jaǵarmaı quıý beketterinde benzındi kem quıý týraly 1 aryz-shaǵym tústi. Jospardan tys tekserý nátıjesinde metrologııalyq buzýshylyqtar anyqtalyp, «Novaıa AZS» seriktestigine ákimshilik aıyppul salynyp, jaýapkershilikke tartyldy, - dedi departament basshysy Baýyrjan Qarsaqbaev. 

Mamandar benzın, motor maıy, turmystyq elektr taýarlarynyń úlgilerin satyp alyp, synaqtan ótkizdi. Synaq qorytyndysy sonyń 3-i, ıaǵnı Qytaıda shyǵarylǵan «Tri Tower», «Arshia» útikteri men «Abesen Q» elektr sháıneginiń tańbalanýy tehnıkalyq reglament talabyna sáıkes kelmeıtinin kórsetti. Ónimderdi aınalymnan alý týraly qaýly qabyldandy.

- Oblystyq sanıtarııalyq-epıdemıologııalyq baqylaý departamenti júrgizgen tekserý nátıjesinde 4 túrli ónimniń sáıkestik deklaratsııalarynyń kúshi joıyldy. Olar — «Al-hayat», «Balqııa» túıirshiktelgen qara sháıi, «Baltys» tartylǵan eti jáne "Al Tamir tea" túıirshiktelgen qara sháıi, - dedi departament basshysy. 

Buǵan deıin biz «Nestle Fýd Qazaqstan» JShS Qazaqstan aýmaǵynda saqtyq sharasy retinde balalar taǵamynyń shekteýli partııalaryn erikti túrde keri qaıtaryp jatqanyn jazǵan edik.