Qyzylordada táýekel tobyndaǵy 148 balaǵa mentor taǵaıyndaldy
QYZYLORDA. KAZINFORM — Bul týraly balalardyń quqyqtaryn qorǵaý jónindegi oblystyq basqarma málimdedi.
Mentorlar «FSM Social» aqparattyq júıesinde tirkelgen táýekel tobyndaǵy balalarǵa kámeletke tolmaǵandardyń isteri jáne olardyń quqyǵyn qorǵaý jónindegi komıssııa sheshimimen, al mektepishilik esepte turǵan balalarǵa bilim berý uıymy basshysynyń buıryǵymen taǵaıyndalady. Balalarǵa qatysty barlyq jumys qupııalylyq qaǵıdatyna sáıkes júrgiziledi.
— Mentorlyq jaı ǵana baqylaý nemese esep júrgizý emes. Árbir mentor balanyń psıhologııalyq jaı-kúıine nazar aýdaryp, otbasymen jáne bilim berý uıymymen birlesip jumys atqarady. Ýaqytynda kórsetilgen qoldaý balanyń ómirge senimin nyǵaıtyp, bolashaǵyna oń áser etedi, — dedi basqarma basshysy Erlan Bákirov.
Basqarma basshysynyń aıtýynsha, 111 nómirli senim telefonyna jáne basqarmanyń call ortalyǵyna oblys turǵyndary tarapynan túrli qońyraý túsedi. Olar, mysaly, qıyn jaǵdaıda qalǵan balalarǵa kómek kórsetý, ata-analar tarapynan jeke máseleler men konsýltatıvtik kómek alý tártibin qamtıdy.
— Mentorlyq jumys tek keńes berýmen shektelmeıdi. Balalardyń bos ýaqytyn tıimdi uıymdastyrýǵa, olardy jazǵy saýyqtyrý lagerlerine, sporttyq, shyǵarmashylyq jáne áleýmettik jobalarǵa tartýǵa erekshe nazar aýdarylady, — dedi Erlan Bákirov.
Aıta keteıik, 2024 jyldan beri júrgizilgen jumys nátıjesinde ár óńirlik ákimdikter qurylymynda balalardyń quqyqtaryn qorǵaý basqarmalarynyń qurylýy — balalardy qorǵaý salasyndaǵy eń mańyzdy oqıǵalardyń biri.
