Qyzylordada taýar baǵasyn durys rásimdemegen 42 saýda ornyna aıyppul salyndy
QYZYLORDA. KAZINFORM — Bıyl 6 aıda baǵanyń negizsiz ósýine jol bermeý jáne saýda zańnamasynyń saqtalýyn qamtamasyz etý maqsatynda Qyzylorda oblysyndaǵy 98 kásipkerlik sýbektisine baqylaý júrgizildi.
Saýda jáne ıntegratsııa mınıstrliginiń Qyzylorda oblysy boıynsha saýda jáne tutynýshylardyń quqyǵyn qorǵaý departamenti tekserý barysynda birqatar kemshilikti anyqtady.
— Áleýmettik mańyzy bar azyq-túlik taýarlary úshin zańnamada belgilengen 15 paıyzdyq saýda ústemesin saqtamaǵan kináli tulǵalar ákimshilik jaýapkershilikke tartyldy. Budan bólek saýda obektilerinde taýar baǵasyn zańnama talabyna sáıkes rásimdemeý faktileri tirkeldi. Ol boıynsha Ákimshilik quqyq buzýshylyq týraly kodekstiń 193-babynyń 4-tarmaǵyna sáıkes 42 kásipkerlik sýbektisine 544 myń teńge kóleminde ákimshilik aıyppul salynyp, ony oryndaý týraly mindetti nusqamalar berildi, — dedi departament basshysynyń orynbasary Ádilhan Tólegenov.
Jyldyń alǵashqy jartysynda Qyzylorda oblysynda áleýmettik mańyzy bar azyq-túlik taýarlary baǵasynyń ortasha ındeksi 101,3% boldy. Bul respýblıkalyq kórsetkishten (101,9%) 0,6% tómen.
Al jýyrda Qyzylordada sanıtarııalyq talapqa saı kelmeıtin ónimder saýdadan alynatynyn jazdyq.
