Qyzylordada taksı júrgizýshisine shabýyl jasaǵan eki kúdikti ustaldy
QYZYLORDA. KAZINFORM – Polıtsııa qyzmetkerleri Qyzylordada taksı júrgizýshisine qaraqshylyq shabýyl jasaǵan eki kúdiktini ustady. Bul týraly Polisia.kz habarlady.
Belgili bolǵandaı, qaskúnemder taksı toqtatyp, qala ortalyǵyna aparyp tastaýdy suraǵan. Júrgizýshi aıtylǵan jerge baǵyt alǵan ýaqytta avtokólik salonynyń artynda otyrǵan bireýi ony uryp-soqqan. Jábirlenýshiniń telefonyn, qolda bar aqshasyn tartyp alyp, kólikten túsirip ketken. Keıin avtokólikti qala syrtyna tastap, oqıǵa ornynan izderin sýytqan.
Qylmyskerlerdi ustaý boıynsha arnaıy jospar engizildi. Kóp uzamaı polıtseıler Shymkent qalasynyń jedel qyzmetkerlerimen birlesip, jedel izdeý jumystaryn júrgizý barysynda eki kúdiktini qolǵa túsirdi. Olardyń Almaty oblysynyń turǵyny ekeni anyqtaldy.
Kúdiktiler qamaýǵa alyndy. Qazirgi kezde tergeý áreketteri júrgizilip jatyr.
Buǵan deıin Qyzylordada 15 jastaǵy qyzǵa úılengen 21 jastaǵy jigit 12 jylǵa sottalǵanyn jazǵan edik.