Qyzylordada taǵy bir túlek UBT-dan 140 ball aldy
QYZYLORDA. KAZINFORM — Qyzylorda oblysynda bıyl osymen ekinshi mektep bitirýshi ulttyq biryńǵaı testileý synaǵynan eń joǵary upaıdy enshiledi.
Ol Jalaǵash aýdanynyń Eńbek aýylyndaǵy Mardan Baıdildaev atyndaǵy № 232 orta mekteptiń 11-synyp oqýshysy Alfııa Balhan.
— Talapker UBT-da eń joǵary nátıje kórsetip, 140 upaı jınady. «Altyn belgi» ıegeri atanǵan talapty túlek qazaq tili men qazaq ádebıeti pánderin tańdap, ustazdarynyń kásibı qoldaýy men sapaly táliminiń, sondaı-aq óziniń tabandy eńbegi, úzdiksiz izdenisi jáne joǵary jaýapkershiliginiń arqasynda bıik belesti baǵyndyrdy, — dep habarlady aýdan ákiminiń baspasóz qyzmeti.
Alfııa UBT-ǵa daıyndyq testin tapsyrǵanda 138 ball jınap, qatarlastarynan oq boıy ozyq kóringen eken.
— Bul — Alfııanyń, ata-anasynyń, ustazdarynyń jáne bilim ordasynyń ortaq jetistigi. Joǵary nátıje aýdanymyzdaǵy bilim sapasynyń artyp kele jatqanyn, sondaı-aq daryndy oqýshylardy qoldaý baǵytynda júrgizilip jatqan júıeli jumystardyń jemisti nátıjesin aıqyn kórsetedi, — delingen habarlamada.
Buǵan deıin Shıeli aýdanyndaǵy Shoqan Ýálıhanov atyndaǵy № 127 orta mektep-lıtseıdiń bitirýshi túlekteri, egiz qyzdar Káýsar jáne Gaýhar Altynsary UBT-da joǵary nátıje kórsetip, aımaq mereıin ústem etken edi.
