Qyzylordada taǵy bir iri ınvestıtsııalyq joba iske asyrylyp jatyr
QYZYLORDA. KAZINFORM — Qyzylorda oblysynda shveıtsarııalyq Harvest Agro kompanııasynyń qatysýymen aýqymdy ınvestıtsııalyq joba iske asyrylyp jatyr.
Joba aıasynda óńirde aýyl sharýashylyǵy ónimderin tereń óńdeýge baǵyttalǵan zamanaýı agroındýstrııalyq klaster qurylady.
Úshjaqty kelisim ótken jyldyń qazan aıynda Aýyl sharýashylyǵy mınıstrligi, Qyzylorda oblysynyń ákimdigi jáne Harvest Agro arasynda jasalǵan. Investıtsııalyq jobanyń jalpy quny 51 mlrd teńgeni quraıdy. Nátıjesinde aımaqta 150-den astam jańa jumys orny ashylady.
Joba boıynsha 23,5 myń gektar alqapta tehnıkalyq qarasora, júgeri jáne soıa daqyldary ósirilip, qaıta óńdelmek.
Birinshi kezeńde bıyl 8,5 myń gektar sýarmaly jer ıgerilip, tuqym óńdeý zaýyty salynady.
Ekinshi kezeńde egis kólemi eki esege ulǵaıyp, qaıta óńdeý qýattylyǵy jylyna 60 myń tonnaǵa deıin jetedi.
Jospar boıynsha jyl saıyn:
• 42 myń tonna tehnıkalyq qarasora
• 70 myń tonna júgeri
• 20 myń tonna soıa óndiriledi
Bul kórsetkishter elimizdiń azyq-túlik qaýipsizdigin nyǵaıtyp, eksporttyq áleýetin arttyrýǵa múmkindik beredi.
Qazirgi tańda kompanııa 6 myń gektar jerdi tegisteý jumystaryn bastap ketti. Alańda 110 tehnıka, 15 jańbyrlatyp sýarý júıesi ornatylyp, 200 adam jumys isteýde. Sý únemdeý maqsatynda tsentrpıvotty jańbyrlatqysh tehnologııalar qoldanylýda.
Aıta keteıik, Memleket basshysynyń tapsyrmasyna sáıkes óńirde sýdy kóp qajet etetin kúrish alqaptaryn kezeń-kezeńimen almastyrý maqsatynda ártaraptandyrý arqyly júgeri sııaqty balama daqyldarǵa kóshý qolǵa alynǵan. Byltyr júgeri 1700 gektarǵa egilse, bıyl bul kórsetkish 10 myń gektarǵa jetpek.
Joba Syr óńiriniń sý resýrstaryn tıimdi paıdalanýǵa, aýyl halqynyń tabysyn arttyrýǵa jáne Qyzylordanyń agrarlyq áleýetin jańa deńgeıge kóterýge baǵyttalǵan.