Qyzylordada tabıǵı monopolııa talabyn buzǵan aýrýhanadan aıyppul óndirildi
QYZYLORDA. KAZINFORM — QR UEM Tabıǵı monopolııalardy retteý komıtetiniń Qyzylorda oblysy boıynsha departamenti Jańaqorǵan aýdandyq kópbeıindi ortalyq aýrýhanasynyń aýyzsý berý jáne sý burý júıesin paıdalaný qyzmetine júrgizilgen jospardan tys tekserý qorytyndysyn jarııalady.
Kásiporyn tirkelimge engizý týraly ótinishpen departamentke júginbegen.
— Atap aıtqanda, tabıǵı monopolııa salasyna tıesili qyzmet kórsetken. Tutynýshylardan sýmen jabdyqtaý qyzmeti úshin 6,5 mln teńge kóleminde jáne sý burý qyzmeti úshin 1,2 mln teńge kóleminde kiris túsirgen. Tabıǵı monopolııalar týraly zańnyń 11-babynyń 1-tarmaǵyna sáıkes rettelip kórsetiletin qyzmetterdi usynatyn dara kásipkerler men zańdy tulǵalardyń ýákiletti organ qalyptastyratyn tizimi tabıǵı monopolııalar sýbektileriniń memlekettik tirkelimi bolyp esepteledi. Tirkelimge enbegen tulǵalar rettelip kórsetiletin qyzmetterdi usyna almaıdy. Kásiporyn zańnyń 11-babynyń talaptaryn saqtamaǵan. Nátıjesinde ákimshilik is qozǵalyp, zańbuzýshylyqty joıý týraly nusqama berildi. Qyzylorda qalasynyń ákimshilik quqyqbuzýshylyqtar jónindegi mamandandyrylǵan sotynyń qaýlysymen aýrýhana ákimshilik jaýaptylyqqa tartyldy. Quqyq buzý arqyly alynǵan 1,2 mln teńge kiris somasy mólsherinde ákimshilik aıyppul salyndy, — delingen habarlamada. Qazirgi kezde aıyppul tolyq kólemde óndirildi.
Eske salsaq, elimizde bólingen qarajattyń tıimdi jumsalýyn qamtamasyz etý maqsatynda «Tabıǵı monopolııalar týraly» QR zańyna ózgerister engizildi.
