Qyzylordada suıytylǵan gaz baǵasynyń ósýi túsinispeýshilik týǵyzdy
QYZYLORDA. KAZINFORM — Máseleniń mán-jaıy búgin Qyzylorda oblysynyń ákimi Murat Ergeshbaevtyń tóraǵalyǵymen ótken májiliste talqylandy.
Aımaq basshysy atap ótkendeı, oblys aýmaǵynda 144 avtogaz quıý stantsııasy, 6 gaz saqtaý qoımasy arqyly 15 operator suıytylǵan gazdy satýmen aınalysady.
— Osy jyldyń 23 sáýirinde «Qyzylorda Gaz» mekemesi alǵashqy bolyp gaz baǵasyn kótergen. Sodan soń ózge operatorlar da birtindep qosa bastady. Oblys ákimdigi júrgizgen jumystyń nátıjesinde operatorlar baǵany birte-birte burynǵy deńgeıge túsire bastady. Degenmen, «Qyzylorda gaz», «Avto Gaz Steıshn», «Kaz Avto Gaz Servıs» operatorlary 5 teńgege qymbattatyp, turǵyndarǵa usynyp keledi. Osyǵan baılanysty jaýapty sala basshylaryna gaz baǵasyn burynǵy deńgeıge shuǵyl qaıtarýdy, halyqqa shekteýsiz túrde satýdy, basqa óńirlerge ruqsatsyz tasymaldaýǵa jol bermeýdi qatań tapsyramyn. Basqa kózderden bolsa da kommertsııalyq gazdy oblysqa jedel jetkizip, áleýmettik baǵamen satyńyzdar. Barlyq tapsyrma sapaly ári ýaqytyly oryndalýy tıis, — dedi Murat Ergeshbaev.
Operatorlar janarmaı beketterindegi baǵanyń qubylýyn kommertsııalyq gaz baǵasynyń ósýimen, keıbiri qosymsha qun salyǵynyń artýymen baılanystyryp otyr. Degenmen, qala jáne aýdan ákimdikterine operatorlardyń gaz qoryna turaqty monıtorıng júrgizý, tapshylyqqa jol bermeý úshin gaz baǵasyn zerdeleý mindeti júkteldi. Aımaq basshysy gaz Úkimettiń erekshe nazarynda turǵanyn, suıytylǵan gazdy turǵyndarǵa tıimdi baǵamen usyný basty mindet ekenin atap ótti. Suıytylǵan gazdyń shekti baǵasyna qatysty ahýal qatań baqylaýda bolatynyn eskertti.
Buǵan deıin biz elimizde gazdyń kóterme baǵasyn joǵarylatý qarastyrylyp jatqanyn jazǵanbyz.
