Qyzylordada sý qysymy nege tómendep ketti
QYZYLORDA. KAZINFORM — Qyzylordalyqtar kún jylynysymen aýyzsýdyń ekpini báseńdeıtinin aıtyp jıi shaǵymdanady.
Oblystyq energetıka jáne turǵyn úı-kommýnaldyq sharýashylyq basqarmasy jylda qaıtalanatyn máseleniń sebebin jaz mezgilinde aýyzsýǵa suranystyń aıtarlyqtaı artýymen baılanystyryp otyr.
— Keıbir turǵyndar ortalyqtandyrylǵan aýyzsý júıesindegi sýdy baý-baqsha, kógal, aǵash sýarý jáne ózge de sharýashylyq maqsattarǵa paıdalanady. Saldarynan sý tutyný kólemi kúrt ósip, ásirese, keshki ýaqytta jáne jeliniń sońǵy núktelerinde sý qysymynyń tómendeýi baıqalady. Aýyzsý júıeleri, eń aldymen, halyqty turmystyq jáne aýyzsý qajettiligimen qamtamasyz etýge arnalǵan. Osyǵan baılanysty turǵyndardy sýdy uqypty ári maqsatty paıdalanýǵa, baý-baqshany múmkindiginshe tehnıkalyq sýmen sýarýǵa shaqyramyz, — delingen basqarma jaýabynda.
Jaýapty mekemeler sýdy ornymen paıdalaný máselesin baqylaýǵa alyp, halyq arasynda túsindirý jumysyn júrgizip keledi.
— Kúndelikti túngi saǵat 12:00 men tańǵy saǵat 7:00 aralyǵynda ǵana baý-baqshaǵa sý berýge bolatynyn eskertemiz. Reıdtik sharalar barysynda eskertýdi elemegenderge shara qoldanylady, — delingen «Qyzylorda sý júıesi» mekemesiniń habarlamasynda.
Eske salaıyq, Qyzylorda oblystyq máslıhatynyń sheshimine sáıkes 2026 jylǵy 1 sáýirden bastap aımaq halqy úshin aýyzsý qyzmetiniń tarıfi ózgerdi.
