Qyzylordada sý aıdyndaryndaǵy kezekshilik 15 qyrkúıekke deıin jalǵasady
QYZYLORDA. KAZINFORM – Qyzylorda oblysynda shomylý maýsymy aıaqtaldy. Bıyl ol 1 maýsym men 31 tamyz aralyǵyna belgilengen bolatyn.
Oblystyq tótenshe jaǵdaılar departamentiniń málimetinshe, kún jyly bolǵandyqtan sýǵa túsip júrgender áli bar.
– Turǵyndar sý aıdyndaryna baryp, balyq aýlaýdy jáne demalýdy jalǵastyryp júr. Osyǵan baılanysty azamattardyń qaýipsizdigin qamtamasyz etý jáne qaıǵyly jaǵdaılardyń aldyn alý maqsatynda 1 qyrkúıekten 15 qyrkúıekke deıin sý aıdyndarynda kúndelikti kezekshilik uıymdastyrylady. Kezekshilik kún saıyn saǵat 12:00-den 19:00-ge deıin júrgiziledi, – dedi departamenttiń basqarma bastyǵy Jandos Dosymov.
Búginde oblys aýmaǵyndaǵy 9 kommýnaldyq jaǵajaı, 32 demalys orny, 5 sport kesheni jáne 9 balalardy saýyqtyrý lageri jumysyn toqtatty. Osy oraıda qutqarýshylar azamattardy tyıym salynǵan jáne arnaıy jabdyqtalmaǵan jerlerde sýǵa túspeýge shaqyrdy. Jyl basynan beri Ákimshilik quqyqbuzýshylyq týraly kodekstiń 412-baby boıynsha 35 adamǵa hattama toltyrylyp, aıyppul salyndy.
Eske sala ketsek, buǵan deıin Aqtóbe oblysynda aýyldyq okrýg ákimderiniń sý aıdyndary men ózenderge tyıym salý belgisin ornatpaǵany anyqtaldy.
