Qyzylordada sport salasynyń úzdikterine qurmet kórsetildi

Aımaq basshysy salany damytýda atqarylyp jatqan jumystarǵa toqtalyp, sportshylardyń jetistikterine joǵary baǵasyn berdi.

Syr óńiriniń sportshylary álemdik dodalar men el birinshilikterinde árdaıym jeńis tuǵyrynan kórinip, elimizdiń atyn álemge tanytyp jatyr.

Halyqaralyq arenada kók týymyzdy kókke kótergen syrboıylyq sportshylar jyl basynan beri álem, Azııa chempıonattarynan 31 altyn, 16 kúmis, 22 qola medal jeńip aldy. Al el birinshilikterinde 120 altyn, 100 kúmis, 162 qola medalǵa qol jetkizdi.

Ótken aıda Qytaıdyń Hanchjoý qalasynda ótken voleıboldy otyryp oınaýdan álem chempıonatynda ulttyq qurama ókilderi qola júldege ıe boldy. Ulttyq qurama sapynda jerlesterimiz Erık Qasqabaev, Shyńǵys Medeýov, Erasyl Ábdibek óner kórsetip, el namysyn abyroımen qorǵady. Shyńǵys Medeýov álem chempıonatynyń «Úzdik oıynshysy» atandy.

Ótken aptada Germanııanyń Dortmýnd qalasynda ótken grek-rım kúresinen halyqaralyq týrnırde Syr maqtanyshy Aıdos Sultanǵalı jeńimpaz atanyp, el mereıin ústem etti.

Kúni keshe ǵana «Qaısar» fýtbol komandasy Qazaqstan kýbogynyń jartylaı fınalynda astanalyq «Jeńis» komandasyn jeńip, fınalǵa joldama aldy.

– Bul jetistikter – memleket tarapynan jasalyp jatqan qoldaýlar men Sizderdiń tynymsyz eńbekterińizdiń jemisi, - dedi Murat Nálqojauly.

Saltanatty is-sharada voleıboldy otyryp oınaýdan álem chempıonatynda qola júlde alǵan ulttyq qurama sapyndaǵy Syr sportshylaryna aımaq basshysy 1 mln teńge qarjylaı sertıfıkat tabystady.

Sonymen qatar sport salasynyń damýyna úles qosqan azamattar oblys jáne Týrızm jáne sport mınıstrliginiń nagradalarymen marapattaldy.

Aıta keteıik, sońǵy tórt jylda Syr óńirinde Prezıdentimizdiń, Úkimettiń erekshe qoldaýymen, sol kezdegi aımaq basshysy Nurlybek Mashbekulynyń bastamasymen 11 myń oryndyq «Kaysar Arena» stadıony, Tennıs, Inklıýzıvti sport ortalyqtary jáne 24 jańa sport nysany paıdalanýǵa berildi.

Qalanyń sáýlettik kelbetine kórik bergen jańa stadıonǵa ÝEFA-nyń 4- sanattaǵy joǵary mártebesi berilip, respýblıkalyq jáne halyqaralyq fýtbol oıyndaryn ótkizýge múmkindik aldy.

Oblys ortalyǵynda aýmaǵy 25 myń sharshy metr «Qyzylorda Arena» kópbeıindi sport kesheniniń qurylysy júrgizilip jatyr. Nysan jyl sońyna deıin el ıgiligine beriledi dep josparlanyp otyr.

Búginde aımaǵymyzda 388 myńnan astam turǵyn buqaralyq sportpen júıeli shuǵyldanady. Sport rezervi men joǵary dárejeli sportshylardy daıarlaıtyn 33 sport mektebinde 22 myńnan astam shákirt kásibı baǵytta tárbıelenedi.