Qyzylordada sóz baılasyp júrgen qyzyn kóshede súıregen jigit jazadan qutylyp ketti
QYZYLORDA. KAZINFORM - Qyzylorda oblysynda sóz baılasyp júrgen qyzyn aıaǵynan teýip qulatyp, kóshede kıiminen tartyp súıregen jigitke qatysty qylmystyq is qaraldy.
Oqıǵa bıylǵy jyldyń 15 qazanynda saǵat 15.00 shamasynda bolǵan. Aýdan ortalyǵy - Shıeli kentinde jigit birneshe jyldan beri sóz baılasyp júrgen jábirlenýshi qyzǵa kúsh qoldanǵan. Ony julqylap, jerge qulatyp, aıaǵynan tepken.
«Tas joldyń ústine kıiminen tartyp súırep, oǵan qatysty tán aýrýyna ushyratqan. Biraq densaýlyqqa jeńil zııan keltirýge alyp kelmegen uryp-soǵý áreketin jasaǵan. Sottalýshy áreketin tolyǵymen moıyndap, jábirlenýshimen tatýlasýyna baılanysty isti óndiristen toqtatýdy surady. Jábirlenýshi bul sózdi rastady. Aýdandyq sottyń qaýlysymen QR Qylmystyq Kodekesiniń 109-1-baby 1-bóligimen sottalýshy QR Qylmystyq Kodeksiniń 68-babynyń 1-bóliginiń talabyna saı jábirlenýshimen tatýlasýyna baılanysty qylmystyq jaýaptylyqtan bosatyldy. Qylmystyq is óndiristen toqtatyldy», - dep málim etti Shıeli aýdandyq sotynan.
Eske salsaq, budan buryn Qyzylorda oblysynda «Qarasora-2024» keń aýqymdy jedel aldyn alý is-sharasy barysynda 207 esirtki quqyq buzýshylyǵy anyqtaldy.