Qyzylordada sottalǵandar úırek-qaz ósirip júr
QYZYLORDA. KAZINFORM — Qyzylorda oblysy boıynsha qylmystyq atqarý júıesi departamentiniń № 60 mekemesinde óndiristik aımaq bar.
Departamenttiń baspasóz qyzmeti habarlaǵandaı, onda 17 shaǵyn jáne orta bıznes sýbektisi jumys istep tur. Bul nysandarda 500-den astam adam túrli salada eńbekpen qamtylǵan.
Sottalǵandardyń bir toby qus sharýashylyǵyna den qoıǵan. Jeke kásipker Orynbasar Turǵanbekuly buǵan deıin mekeme aýmaǵyndaǵy dánekerleý tsehynda qorshaý, peskoblok ónimderin shyǵarýmen aınalysyp kelgen. Endi oǵan qus sharýashylyǵy qosyldy. Onyń ishinde taýyq, úırek pen qaz ósiredi.
— Qaz ósirip, kóbeıtip satýdy josparlap otyrmyn. Qustyń eti de, jumyrtqasy da halyqqa paıdaly. Bul jumysqa túzeý mekemesinde jazasyn óteýshiler tartylǵan, — dedi kásipker.
Sonyń biri eńbektiń arqasynda jalaqy alyp, bala-shaǵany asyraýǵa sep bolǵanyna rıza.
— Bala kezimizde ózimiz de taýyq, úırek, qaz baqtyq. Bul biz úshin qıyn emes, qaıta eńbekke aralasqanyma qýanyshtymyn, — dedi ol.
Túzeý mekemesinde sottalǵandardyń ýaqytyn tıimdi ótkizip, eńbekke baýlý arqyly olardyń áleýmettik beıimdelýine osyndaı múmkindik jasalǵan. Kásipker endi qus sanyn kóbeıtip, kásip aıasyn keńeıtisi keledi.
Buǵan deıin habarlaǵanymyzdaı, Qyzylorda oblystyq qylmystyq atqarý júıesi departamentine qarasty № 60 mekemede sot úkimi boıynsha bostandyǵynan aıyrylǵandardy 13 kásiporyn jumyspen qamtyp otyr.