Qyzylordada sottalǵandar týǵan-týystarymen kezdesti

QYZYLORDA. KAZINFORM — Halyqaralyq Nelson Mandela kúnine oraı, Qyzylorda oblysy boıynsha Qylmystyq-atqarý júıesi departamentiniń 37 mekemesinde sottalǵandardyń týǵan-týystaryna arnalǵan ashyq esik kúni ótti.

Mekeme qyzmetkerleri ashyq esik kúnin ótkizýdiń maqsatymyn tanystyryp, mekeme aýmaǵyna ekskýrsııa uıymdastyrdy.

Ashyq esik kúnine biriniń anasy, endi biriniń jubaıy, keıbir jazasyn óteýshilerdiń aǵa-inileri keldi. Olar jazasyn óteýshilerdiń jatyn oryndarynan bastap, ashana, kitaphana, jýyný bólmelerin aralap kórdi.

Sottalǵandar týǵan-týystarymen kezdesip, qal-jaǵdaılaryn surasyp jatyr. Jazasyn óteýshilerdiń týǵan-týystary da kókeılerinde júrgen suraqtaryn qoıyp, osyndaı kezdesý uıymdastyrǵan mekeme ákimshiligine alǵystaryn jaýdyrdy.

Alǵys aıtqan ananyń balasy osy mekemede jazasyn ótep jatyr. Uly abaısyzda jol kólik oqıǵasyn jasap, sot úkimimen bas bostandyǵynan aıyrylǵan. 

«Ulym qansha jasta bolsa da men úshin áli bala. „Súrinbeıtin tuıaq, jańylmaıtyn jaq joq“ demekshi, balama analyq aqylymdy aıtýǵa keldim. Mańdaıyńa osy jerde bolý jazsa qaıtemiz endi, shúkir, jaǵdaıyn kózben kórdim. Jazasyn ótep, aman-esen ortamyzǵa — otbasyna oralsyn deımiz. Kúndelikti telefon arqyly sóılesip turǵanymyzben, kózben kórý bir bólek. Er jigittiń basyna ne kelip, ne ketpeıdi, ulyma shydamdy, sabyrly bol, jaqsy kúnderiń alda dep aqylymdy aıttym. Osyndaı is-sharany uıymdastyrǵan mekeme ákimshiligine alǵysym sheksiz», — dedi sottalǵannyń anasy.

Mekemede mundaı is-sharalar toqsan saıyn ótkizilip turady.

Jaza basyp, jańylǵan azamattardy túzetýge oń áserin tıgizip, týǵan-týystarymen baılanysty qalyptastyrýǵa kómektesedi.