Qyzylordada sottalǵandar arasynda otbasyn qurǵandar qatary artty
QYZYLORDA. KAZINFORM – Qyzylorda oblysynyń qylmystyq atqarý júıesi departamentine qarasty №60 mekemede myńǵa jýyq adam jazasyn ótep jatyr. Olardyń arasynda otbasyn quryp, nekesin zańdastyrǵandar sany artyp keledi.
Departamenttiń baspasóz qyzmeti habarlaǵandaı, jyl basynan beri 27 adam teńin taýyp, nekelesýge ótinish bergen. Bul kórsetkish ótken jylmen salystyrǵanda 3%-ǵa joǵary.
– Jas jubaılarǵa Otbasy ortalyǵynyń ókili neke kýáligin saltanatty túrde tabystaıdy. Mańyzdy sharaǵa mekeme teologtary da qatysyp, otbasynyń qoǵamdaǵy orny, syılastyq pen tatýlyqtyń mańyzy jóninde túsindirme jumysyn júrgizedi. Otbasyn qurý týraly sheshim qabyldaǵan azamattardyń ómirge qatysty ustanymy ózgerip, bolashaqqa senimi nyǵaıa túsedi. Bul olardyń qoǵamǵa beıimdelýine jáne qaıta qylmysqa barmaýyna áser etedi, – dedi mekeme zańgeri Ardaq Іzmaǵambetova.
Buryn habarlaǵanymyzdaı, Ulttyq statıstıka bıýrosy Halyqaralyq otbasy kúnine oraı Qazaqstandaǵy neke statıstıkasyn jarııalady.
