Qyzylordada sottalǵan adamǵa kámpıt ishine jasyrylǵan esirtki ótkizbek bolǵan azamatsha ustaldy

QYZYLORDA. KAZINFORM - Qyzylordada jazasyn ótep jatqan turǵynǵa tátti kámpıtpen birge belgisiz aq untaqty ótkizýge neıettengen áıel adamnyń áreketi áshkere boldy.

Qyzylorda oblysy boıynsha Qylmystyq atqarý júıesi departamentiniń №60 mekemesinde tyıym salynǵan zattardy ótkizý áreketi anyqtalyp, der kezinde toqtatyldy. Jazasyn óteýshige kámpıt ishine jasyrylǵan esirtki zattaryn jetkizýge tyrysqan azamatsha ustaldy.

- Azamatsha qaraqshylyq úshin jazasyn ótep jatqan sottalǵanǵa aq tústi 12 qaǵazǵa oralǵan kámpıt pen belgisiz aq untaqty alyp kelgen. Oǵan qatysty Qyzylorda qalalyq polıtsııa basqarmasynyń jedel-tergeý toby shaqyryldy. Tergeý barysynda ózine tán ótkir ıisi bar jasyl tústi jáne aq untaq zattar tárkilenip, sot-hımııalyq saraptama taǵaıyndaldy. Saraptama nátıjesinde tárkilengen zattardyń 31,99 gramm keptirilgen marıhýana jáne 0,41 gramm mefedron ekeni anyqtaldy, - dep málim etti Qyzylorda oblystyq Polıtsııa departamentinen.

Vedomstvo málimetinshe, atalǵan derekke baılanysty áıel kisige QR Qylmystyq kodeksiniń 297-babynyń 1-bóligi boıynsha qylmystyq is qozǵaldy. Qazir sotqa deıingi tergep-tekserý jumystary júrgizilip jatyr.

Eske salsaq, budan buryn Qyzylordada zańsyz oıyn bıznesin uıymdastyrǵan bes adam sottaldy.