Qyzylordada sońǵy qońyraý keshine aqsha jınaýǵa qatań tyıym salyndy

QYZYLORDA. KAZINFORM — Qyzylorda oblysynda bıylǵy oqý jyly 23 mamyr kúni «Bilimim — Otanyma» atty biryńǵaı synyp saǵatymen qorytyndylanady.

Oblystyq bilim basqarmasynyń málimetinshe, sol kúni saǵat 9-da barlyq mektepte bitirýshilerge arnalǵan «Mektebim, saǵan myń alǵys!» atty saltanatty is-shara ótedi. Ony mektepte qarapaıym formatta ótkizý mindet. 

— Ata-analar men oqýshylardan, muǵalimderden mektep bitirýge baılanysty aqsha jınaýǵa qatań tyıym salyndy. Saltanatty keshterdi meıramhanalarda ótkizýge, kortej uıymdastyrýǵa jol berilmeıdi. Bul sharalar oqýshylardyń qaýipsizdigi men tártipti saqtaý úshin qabyldanǵan. Mektep bitirý sharalarynda balalardyń ómir qaýipsizdigi basty nazarda bolýy tıis. Barlyq deńgeıdegi bilim berý uıymdary medıtsınalyq qyzmet, órt sóndirý, ishki ister organdarymen birge kezekshilik pen aldyn alý sharalaryn uıymdastyrýy qajet, — dedi basqarma basshysy Asqarbek Esjanov.

9-synyptardyń qorytyndy emtıhany 29 mamyr-10 maýsym, al 11-synyptardiki 30 mamyr-16 maýsym aralyǵynda ótedi. Emtıhan kezinde de oqýshylar men ata-analardan muǵalimderge syılyq jasaý nemese dastarhan jaıýǵa tyıym salynady.

5-8 jáne 10-synyptarda oqıtyn 80 myńǵa jýyq oqýshy qazaq tili páninen qorytyndy emtıhandy 26-29 mamyr aralyǵynda tapsyrmaq. «Altyn belgige» úmitkerler 4, 9 maýsym kúnderi jazbasha emtıhan tapsyrady. Bul emtıhandardy oblystyq komıssııa baqylaıdy.

Jýyrda QR Halyqaralyq baǵdarlamalar ortalyǵy Grýzııanyń joǵary oqý oryndaryna oqýǵa qujattar qabyldanatynyn habarlaǵanyn jazǵanbyz. Ótinim 26 mamyrǵa deıin qabyldanady.