Qyzylordada sol jaǵalaý men qalany baılanystyratyn kópir salynady
QYZYLORDA. KAZINFORM – Qyzylorda qalasynda bıýdjet qarjysynyń aýqymdy bóligi halyqtyń suranysy men talaby jıi baǵyttalatyn jol-kólik ınfraqurylymyn jaqsartýǵa arnalǵan.
23 joba aıasynda uzyndyǵy 71,1 shaqyrym 71 kóshe kúrdeli jóndeý men qaıta jańǵyrtýdan ótip, 1 kópir salynyp jatyr.
32 kóshede kúrdeli jóndeý jumysy qarqyn aldy. Ótken jyly 8 kóshedegi sharýa tolyq aıaqtalsa, bıyl qalǵan 24 kóshedegi jumysty jyl sońyna deıin qorytyndylaımyz. Mańyzdy nysandardyń biri – «Báıterek» shaǵyn aýdanyndaǵy ońtústik magıstraldy kanal arqyly ótetin jańa kópirdiń qurylysy. Jobanyń daıyndyǵy jaqsy deńgeıde, qyrkúıek aıynda paıdalanýǵa beremiz. Qyrkúıek aıynda sondaı-aq Toraıǵyrov kóshesinen Qyzylorda-Qumkól avtojolyna deıingi Saǵymbaev kóshesin qaıta jańǵyrtýdy da aıaqtaımyz. Bul eki nysan Batys Eýropa - Batys Qytaı halyqaralyq dálizi men Astana qalasynan keletin joldy túıistiretin qaqpaǵa aınalady, - dedi qala ákimi Nurjan Ahatov.
Qaladaǵy Nazarbaev dańǵyly men Tasbóget kentindegi Imanov, Bozǵul-1, Naýryz, Sh.Esenov kósheleri de jańa keıipke enbek. Bul kósheler plotınaǵa deıin keńeıip, jol qozǵalysyna túsetin júkteme azaıady. Odan bólek kentter men aýyldyq okrýgterdegi 32 kóshe jóndelip jatyr.
Josparymyzdaǵy taǵy bir ilkimdi is – sol jaǵalaý men qalany baılanystyratyn avtojol kópiri. Isa Toqtybaev kóshesinen Syrdarııa ózeni arqyly ótetin avtojol ótkeliniń quny – 19,5 mlrd teńge. Nysan qurylysyn bastaý úshin respýblıkalyq bıýdjetke ótinim berildi, - dedi qala ákimi.
Jýyrda Kólik mınıstrligi Avtomobıl joldary komıteti tóraǵasynyń orynbasary Anar Ǵabdýllına Semeı qalasyndaǵy avtogýj kópirin rekonstrýktsııalaý jumystarynyń barysyn tekserdi.
