Qyzylordada soǵys jáne tyl ardagerlerine qandaı kómek beriledi
QYZYLORDA. KAZINFORM — Qyzylorda oblysynda Jeńis kúnine oraı Ekinshi dúnıejúzilik soǵysqa qatysýshylarǵa beriletin birrettik tólem artty. Sońǵy tórt jylda onyń kólemi 1,5 mln teńgeden 5 mln teńgege, al bıyl 5,5 mln teńgege ósip otyr.
— Syr óńirinde jalǵyz qart maıdanger qaldy. Jasy 104-ke taıaǵan ıAhııa Tasyrov búginde Syrdarııa aýdanynyń Tereńózek kentinde turyp jatyr. Oǵan soǵys ardageri retinde 1272 aılyq eseptik kórsetkish nemese 5,5 mln teńge mólsherinde kómek taǵaıyndaldy, — dedi oblystyq jumyspen qamtýdy úılestirý jáne áleýmettik baǵdarlamalar basqarmasy bólim basshysy Smat Seıdahmetov.
Soǵys jyldarynda tyldaǵy qajyrly eńbegi men minsiz áskerı qyzmeti úshin:
— burynǵy KSR Odaǵynyń orden, medaldaryn ıelengenderge — 60,
— 1941-1945 jyldary soǵys kezeńinde keminde 6 aı qyzmet ótkergen tyl ardagerlerine, tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń orden-medaldarymen marapattalǵan adamdarǵa — 50,
— sondaı-aq soǵys ardagerlerine teńestirilgen (qatysýshylary men múgedekterinen basqa) ardagerlerge, soǵys kezeńinde qyzmet ótkergen áskerı qyzmetshilerge, fashıstik Germanııaǵa qarsy is-qımyldarǵa qatysqandarǵa, Lenıngrad qalasynda blokada kezeńinde jumys istegen azamattarǵa, kontslagerlerdiń kámeletke tolmaǵan tutqyndaryna, jaralaný saldarynan múgedek bolǵan áskerı qyzmetshilerge, azamattyq nemese áskerı maqsattaǵy nysandardaǵy radıatsııalyq apattar men ıadrolyq synaqtar saldarynan múgedektigi anyqtalǵan adamdarǵa, qaza tapqan áskerı qyzmetshilerdiń otbasylary men qaıtys bolǵan soǵys múgedeginiń jubaılaryna, Chernobyl apaty men Semeı ıadrolyq polıgonyndaǵy ıadrolyq synaqtardy joıýǵa, basqa memleketterdiń aýmaǵyndaǵy, onyń ishinde Tájik-Aýǵan ýchaskesindegi áskerı is-qımyldarǵa, Iraktaǵy halyqaralyq bitimgershilik operatsııasyna, Taýly Qarabaqtaǵy etnosaralyq qaqtyǵysty retteýge (Aýǵanstandaǵy urys qımyldarynyń ardagerlerinen basqa) qatysqandarǵa, Ardagerler týraly zań kúshi qoldanylatyn (tyl eńbekkerleri, qaza tapqan áskerı qyzmetshilerdiń otbasylary, qaıtys bolǵan soǵys múgedeginiń jubaılary) basqa adamdarǵa 50 aılyq eseptik kórsetkish mólsherinde, ıaǵnı 216 250 teńgeden tólenedi.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń habarlaýynsha, Qyzylordada soǵys ýaqytynda tylda bel jazbaı eńbek etken 1331 adam bar.
Al Batys Qazaqstan oblysynda bıyl Jeńis kúnine oraı 1 722 adamǵa 91,8 mln teńgege birjolǵy áleýmettik kómek kórsetiletini aıtyldy.