Qyzylordada Syrdarııa arqyly ótetin jańa kópir salynady
QYZYLORDA. KAZINFORM – Qyzylordada Syrdarııa ózeni arqyly ótetin jańa kópir qurylysy bastalyp, nysannyń kapsýlasy salyndy.
Jańa kópir I.Toqtybaev kóshesinen Syrdarııa ózeni arqyly ótedi. Qurylys jumystaryn «VD Stroı Injınırıng» kompanııasy júrgizedi. Kópirdiń uzyndyǵy 338 metr, eni 23 metr bolady.
Kapsýla salý rásimine oblys ákimi Murat Ergeshbaev, Quryltaı depýtattary, quqyq qorǵaý organdarynyń basshylary, máslıhat depýtattary, zııaly qaýym ókilderi men el aǵalary qatysty.
– Búgin sizdermen birge tarıhı oqıǵanyń kýási bolyp otyrmyz. Syrdarııa ózeni arqyly ótetin jańa kópir kapsýlasyn salý jańa nysan qurylysyna ǵana emes, aımaq damýynyń jańa belesine bastaý bolmaq, – dedi oblys ákimi.
Aımaq basshysy óńirde ınfraqurylymdy jańǵyrtý jáne turǵyndardyń ómir súrý sapasyn arttyrý baǵytynda birqatar joba júzege asyrylyp jatqanyn atap ótti.
Qazir Jańaqorǵan, Shıeli, Qazaly jáne Sekseýil temirjol vokzaldaryndaǵy jumystar tolyq aıaqtalǵan. Talap beketindegi jolaýshylar platformasy qaıta jańǵyrtylyp, Jalaǵash pen Tereńózektegi eki qyzmet kórsetý pýnktinde jumystar jalǵasyp jatyr. Sondaı-aq Aral teńizi, Tóretam jáne Josaly temirjol vokzaldary qaıta jańǵyrtýdan keıin paıdalanýǵa berildi.
Syrdarııa ózeniniń qorǵanys bógetterin nyǵaıtý jumystary da júrgizilip jatyr. Ózen jaǵalaýynda eki jolaqty jaıaý júrginshiler jáne velosıped joldary salynyp jatyr. Joba jaǵalaýdy sý tasqynynan qorǵaýmen qatar, turǵyndarǵa qolaıly demalys aımaǵyn qalyptastyrýǵa baǵyttalǵan.
Bıyl Qyzylorda qalasynyń jol-kólik ınfraqurylymyn damytýǵa jalpy quny 30 mlrd teńge bolatyn 22 joba iske asyrylyp jatyr.
