Qyzylordada «Syr jastary» óńirlik baǵdarlamasynyń qatysýshylaryna úı berildi
ASTANA. KAZINFORM - Táýelsizdik kúni aıasynda oblys ákimi Nurlybek Nálibaev «Syr jastary» óńirlik baǵdarlamasynyń qatysýshylaryna 40 páterlik turǵyn úıdiń kiltin tabystady.
Qyzylorda oblysy ákiminiń baspasóz qyzmeti málim etkendeı, saltanatty rásimge oblystyq máslıhat tóraǵasy Murat Tileýimbetov, zııaly qaýym ókilderi, jaýapty sala basshylary men qala turǵyndary qatysty.
Aımaq basshysy jańa qonys ıelerine izgi tilegin bildirip, óńirdegi aýqymdy jobalardy atap ótti.
- Barshańyzdy Táýelsizdik kúnimen shyn júrekten quttyqtaımyn! Búgin mereıli mereke aıasynda aımaq jastaryna bes qabatty turǵyn úı páterleriniń kiltin saltanatty túrde tabystaýdamyz. Memleket basshysy Qasym-Jomart Kemeluly «Eńbek jolyn endi ǵana bastaǵan jastar birden páter satyp ala almaıtyny túsinikti. Jastardyń baspana alýyna jan-jaqty jaǵdaı jasaý kerek. Bul – memlekettiń basty mindetiniń biri» dep atap ótti. Jastardyń turǵyn úıge muqtajdyǵy máselesin sheshý úshin 2022 jyldyń jeltoqsan aıynda ótken oblystyq jastar forýmynda alǵash ret «Syr jastary» baǵdarlamasyn nesıelendirý jolymen júzege asyrý týraly sheshim qabyldandy. Oǵan oblystyq bıýdjetten «Otbasy bank» turǵyn úı qurylys jınaq banki» arqyly kredıt berýge 1,2 mlrd teńge bólindi. «Syr jastary» – jylyna 100 jas otbasyny baspanamen qamtý baǵytynda qolǵa alynǵan óńirlik tyń joba. «Jumyla kótergen júk jeńil» degen sóz bar halqymyzda. Óz kezeginde baǵdarlamany birlesip júzege asyrý úshin «Otbasy bank» 500 mln teńge qarjy bóldi. Mamyr aıynda 60 jas otbasy baspanaly boldy. Búgin mine 40 páterdiń kiltin tabystaımyz. Bul qonystoı – bastalǵan jumystyń jalǵasy. Baǵdarlamaǵa kelesi jylǵa da oblystyq bıýdjetten qarjy qaraldy. Shańyraqtaryńyz balalarmen bazarly, qutty qonaqtarymen ajarly bolsyn! – dedi N.Nálibaev.
Іs-sharada memleket jáne qoǵam qaıratkeri, Qyzylorda oblysynyń Qurmetti azamaty Bıǵalı Kaıýpov batasyn berip, jańa páter ıesi, kópbeıindi qalalyq aýrýhananyń jas mamany Saltanat Seıitkamal kórsetilgen qoldaýǵa alǵysyn jetkizdi.
Búgin páter kiltin alǵan otbasylar qatarynda ustazdar, medıtsına mamandary men bıýdjettik mekeme qyzmetkerleri bar.
Aıta keteıik, bıyl oblys bıýdjeti 750 mlrd teńgege jetip, turǵyn úı qurylysyna jáne jeke salýshylardan daıyn páterler satyp alýǵa 39 mlrd 100 mln teńge bólindi. Ótken jyldan beri qalada jeti, toǵyz, on eki qabatty turǵyn úıler boı kóterip jatyr.
Memleket basshysynyń qoldaýymen ulttyq jobalar aıasynda sońǵy eki jylda 4 myńǵa jýyq páter tabystalyp, 17 myń turǵynnyń baspana máselesi sheshildi. Jyl basynan beri 2000-ǵa jýyq otbasy qonystoı toılady, turǵyn úı qurylysy kólemi 126 paıyzǵa ósti.