Qyzylordada sıntetıkalyq esirtki jarnamalaıtyn 71 saıt buǵattaldy

QYZYLORDA. KAZINFORM – Qyzylordada «Jasóspirim» respýblıkalyq jedel profılaktıkalyq is-sharasy qorytyndylandy.

Oblystyq Polıtsııa departamenti jergilikti polıtsııa qyzmeti basqarmasynyń málimetine súıensek, is-shara uıymdastyrylǵan 10 sáýir men 6 mamyr aralyǵynda kámeletke tolmaǵandarǵa qatysty barlyǵy 1231 ákimshilik hattama rásimdeldi. Onyń ishinde 27 jasóspirim ishki ister organdarynyń esebine alynsa, qadaǵalaýsyz jáne panasyz qalǵan 28 jasóspirim kámeletke tolmaǵandardy beıimdeý ortalyǵyna jatqyzyldy. 20 jasóspirim tyıym salynǵan zattardy (shappa, kastet) alyp júrgeni úshin polıtsııa bólimderine jetkizildi.

– Bala tárbıesindegi mindetin durys oryndamaǵany úshin 117 ata-anaǵa hattama toltyryldy. Túngi ýaqytta jasóspirimderdi qabyldaǵan 23 oıyn-saýyq nysanynyń ıesine qatysty ákimshilik sharalar qoldanyldy. 42 jasóspirimniń kópshilik oryndardy lastaǵany, 23 jasóspirimniń buzaqylyq jasaǵany, 18 jasóspirimniń túngi tynyshtyqty buzǵany anyqtaldy. Olardyń zańdy ókilderine shara qabyldandy, – dedi basqarma bastyǵynyń orynbasary Raýan Áldeshov.

Oblystyq Polıtsııa departamentiniń esirtki qylmysyna qarsy is-qımyl basqarmasy «Kıberqadaǵalaý» aqparattyq júıesi arqyly sıntetıkalyq esirtki zattaryn jarnamalaıtyn 71 saıtty, Qyzylorda qalalyq Polıtsııa basqarmasy adamdy sýıtsıdke ıtermeleıtin 1 oıyndy (Ragdoll Games-Kick & Break) buǵattady.

Buǵan deıin Qyzylordada «Jasóspirim» jedel profılaktıkalyq is-sharasy bastalǵan 4 kún ishinde 264 ákimshilik hattama rásimdelgenin habarlaǵan bolatynbyz.