Qyzylordada sıntetıkalyq esirtki saqtaǵan adam bas bostandyǵynan aıyryldy

Qyzylordada sıntetıkalyq esirtki saqtaǵan 28 jastaǵy adam úsh jylǵa bas bostandyǵynan aıyryldy, dep habarlaıdy Kazinform.

Qyzylorda qalasynyń №2 sotynda 28 jastaǵy er adamǵa qatysty qylmystyq is boıynsha sot úkimi shyqty. Odan óte úlken mólsherde sıntetıkalyq esirtki tabylǵan edi.

Sottalýshy mamyr aıynda kópqabatty úılerdiń janyndaǵy aǵashtyń arasynan bir dana qyzyl jabysqaq taspaǵa oralǵan untaq zat salynǵan paketti taýyp alǵanyn aıtady. Odan keıin izdeýdi jalǵastyryp, úsh býmasyn taýyp alǵan.

«Tabylǵan sıntetıkalyq esirtki zattyń jalpy salmaǵy - 2,14 gramm. Polıtsııa qyzmetkerleri kúdikti adamdy qolǵa túsirdi. Sot úkimimen sottalýshy QR Qylmystyq kodeksiniń 296-babynyń 4-bóligimen jasaǵany úshin kináli dep tanyldy. Ol 3 jyl merzimge bas bostandyǵynan aıyryldy. Ol jazasyn ortasha qaýipsizdik deńgeıdegi qylmystyq-atqarý júıesi mekemesinde jazasyn óteıdi», - dep málim etti Qyzylorda oblystyq polıtsııa departamentinen.

Eske salsaq, budan buryn Qyzylorda oblysynda 8 otbasy ata-ana quqyǵynan aıyryldy.