Qyzylordada shomylý maýsymynda 25 adam sýǵa ketti

QYZYLORDA. KAZINFORM — Qyzylorda oblystyq tótenshe jaǵdaılar departamenti shomylý maýsymynyń jabylǵanyn málimdedi. Ókinishtisi, sýǵa túsý maýsymy adam shyǵynynsyz ótken joq. 

Jyl bastalǵaly beri oblys aýmaǵyndaǵy sý aıdyndarynda 25 adam ajal qushty. Onyń 11-i — bala. Qaıǵyly jaǵdaılardyń basym bóligi Qyzylorda qalasy (9), Qarmaqshy (5) jáne Aral (3) aýdandarynda tirkeldi. Ótken jyly 14 adam, onyń ishinde 10 bala sýǵa ketip kóz jumdy.

— Oblys aýmaǵynda resmı túrde bekitilgen 7 jaǵajaı bar bolsa, bıyl sonyń tek 6-y jumys istedi. Adam shyǵynynyń negizgi sebebi qaýipsizdik erejelerin óreskel buzýdan bolǵan. Aǵysy jyldam, tereń, jaǵasy tik jar ózen, kanaldarǵa túsý, spırttik ishimdik iship shomylý tyıylmaı tur. Úlkender balalardy kóbine baqylaýsyz qaldyrady. Jyl basynan beri sý aıdyndarynda qaýipsizdik qaǵıdalaryn buzǵany nemese oryndamaǵany úshin 48 ata-anaǵa aıyppul salyndy, — dedi departamenttiń basqarma bastyǵy Jandos Dosymov.

Sýǵa shomylýǵa tyıym salynǵan qaýipti sý aıdyndaryndaǵy 63 aımaqqa 400-ge jýyq eskertý taqtaıshasy ornatyldy. Departament tarapynan 24 mobıldi post ornatyldy.

Eske salsaq, jýyrda Qonaev qalasynda shomylý maýsymy kezinde 30-ǵa jýyq azamattyń ómirin saqtap qalǵan dárigerler men qutqarýshylar marapattaldy.