Qyzylordada ishimdiksiz aýyldar sany 47-ge jetti
QYZYLORDA. KAZINFORM — QR Іshki ister mınıstrliginiń nusqaýyna sáıkes 2026 jylǵy 15-19 maýsym aralyǵynda elimizde «Іshimdiksiz aýyl» jedel-profılaktıkalyq is-sharasy ótip jatyr.
Qyzylorda oblysynda aýyl aqsaqaldary, prokýratýra, jergilikti atqarýshy organdar, polıtsııa qyzmetkerleri jáne belsendi jastardyń birlesken jumysy nátıjesinde buǵan deıin 39 aýyl «Іshimdiksiz aýyl» mártebesine ıe bolǵan edi.
Oblystyq polıtsııa departamenti oǵan taǵy 8 aýyl qosylǵanyn atap ótti.
— Jańaqorǵan aýdanyndaǵy Aqqum jáne Manap aýyldary, Aral aýdanyndaǵy Úkilisaı aýyly, Qarmaqshy aýdanyndaǵy Aldashbaı ahýn aýyly, Syrdarııa aýdanyndaǵy Aqjarma, A.Toqmaǵambetov jáne S. Seıfýllın aýyldary bastamany qoldady. Nátıjesinde ishimdiksiz aýyldar sany 47-ge jetti. Bul eldi mekenderde qoǵamdyq tártip nyǵaıyp, quqyq buzýshylyqtar men qylmys deńgeıiniń tómendegeni baıqaldy. Ásirese, turmystyq janjaldar, qoǵamdyq oryndardaǵy quqyqbuzýshylyqtar jáne alkogoldi ishimdikterge baılanysty keleńsiz oqıǵalar azaıǵan, — delingen habarlamada.
Tizimge engen eldi mekenderdiń biri — Qyzylorda qalasyna qarasty Baımurat batyr aýyly. Munda 2300-den astam adam turady, olarǵa 4 saýda orny qyzmet kórsetedi. Bastamany dúken ıeleri de, turǵyndar da biraýyzdan maquldady.
Іs-shara bastalǵaly oblys kóleminde Ákimshilik quqyqbuzýshylyq týraly kodekstiń 200-baby boıynsha alkogol ónimderin ótkizý talaptaryn buzýdyń 18 deregi jáne 440-baby boıynsha qoǵamdyq oryndarǵa masań kúıde kelýdiń 73 deregi anyqtalyp, quqyq buzýshylarǵa qatysty ákimshilik sharalar qoldanyldy.
