Qyzylordada sheteldik týrısterge QR kody bar týrkartalar taratyldy

QYZYLORDA. KAZINFORM — Qyzylorda oblystyq polıtsııa departamentiniń kóshi-qon qyzmeti basqarmasy óńirge kelgen sheteldikterge «Safetravel.kz» mobıldi saıtynyń múmkindigin tanystyryp júr. Bul týraly departamenttiń baspasóz qyzmeti habarlady.

Atalǵan saıt Іshki ister mınıstrliginiń bastamasymen elimizde sheteldik týrısterdiń qaýipsizdigin qamtamasyz etý jáne olardyń Qazaqstan aýmaǵynda erkin ári qaýipsiz júrýine jaǵdaı jasaý maqsatynda iske qosylǵan bolatyn.

— Departamenttiń kóshi-qon qyzmeti basqarmasy óńirge kelgen sheteldikterge QR kody bar týrıstik karta taratady. Onda týrısterge qajet barlyq mańyzdy aqparat — shuǵyl baılanys, qaýipsizdik erejeleri, memlekettik qyzmet alý tásilderi kórsetilgen. «Azamattarǵa arnalǵan úkimet» memlekettik korporatsııasymen birge halyqqa qyzmet kórsetý ortalyqtarynda sheteldikterge qyzmet kórsetý barysynda týrıstik kartalar taratylyp, saıtpen jumys isteý tártibi túsindiriledi, — delingen habarlamada.

Sonymen qatar atalǵan ortalyqtarda «Safetravel.kz» saıtyna kirý tásilderi jazylǵan QR kody bar stendter ornatylǵan.

Eske salsaq, týrıstik kartada kórsetilgen QR kody arqyly birneshe tilde aqparat beretin arnaıy portalǵa ótýge bolady.