Qyzylordada shet elden kelgen 382 adam turyp jatyr
QYZYLORDA. KAZINFORM – Jyl basynan beri Qyzylorda oblysynda 4 167 sheteldik ýaqytsha tirkeýge alyndy. Onyń 4093-i TMD memleketterinen kelgen.
Osy ýaqytqa deıin eki márte jedel-profılaktıkalyq is-shara uıymdastyrylyp, 265 sheteldiktiń kóshi-qon zańnamasyn buzǵany anyqtaldy. Onyń ishinde 110 adam ákimshilik jolmen respýblıka aýmaǵynan alastatyldy.
– Shetel azamattarynyń ýaqytyly tirkelýin qamtamasyz etpegen 167 qazaqstandyq ákimshilik jazaǵa tartyldy. Búginde 382 adam syrttan kelip, óńirimizge turaqty qonystanǵan, basym kópshiligi TMD elderinen, arasynda sondaı-aq 82 etnıkalyq qazaq bar. Esepti merzimde 10 adamnyń el azamattyǵyn alý jónindegi ótinishi qanaǵattandyryldy, – dedi oblystyq polıtsııa departamenti kóshi-qon basqarmasy bastyǵynyń orynbasary, polıtsııa polkovnıgi Saǵyndyq Qamıtbekov.
Sondaı-aq 21 myń adam jeke basyn rastaıtyn qujattaryn aldy. Múmkindigi shekteýli adamdar, zeınetkerler men kópbalaly analarǵa mobıldi toptar úıine baryp qyzmet kórsetti.
Іshki ister mınıstrligi Kóshi-qon qyzmeti komıtetiniń tóraǵasy Aslan Atalyqov bıyl elimizge 3 mln-ǵa jýyq sheteldik kelýi yqtımal ekenin aıtty.