Qyzylordada shegirtke basqan alqaptarǵa dári sebilip jatyr
QYZYLORDA. KAZINFORM – Qyzylorda oblysynda bir ret bas kóterse, jolyndaǵyny jaıpap jiberetin shegirtkeniń qaýipti túrlerine qarsy kúres sharalary bastaldy. Onyń ishinde eń qaýiptisi retinde ekeýi, ıaǵnı ıtalııalyq prýs pen azııalyq shegirtke atalady.
QR AShM Agroónerkásiptik keshendegi memlekettik ınspektsııa komıteti Qyzylorda oblystyq aýmaqtyq ınspektsııasynyń málimetinshe, bıyl 65 180 gektar jerdi hımııalyq óńdeý josparlanǵan.
- Italııalyq prýsqa qarsy ekonomıkalyq zııandylyq sheginen asqan 10 600 gektar jerdiń 8 793 gektary óńdeldi. Qarmaqshy, Jalaǵash, Syrdarııa aýdandarynda jumys aıaqtalsa, Aral, Qazaly aýdandarynda jalǵasyp jatyr. Oǵan 4 arnaıy jer agregaty, 5 dron, 2 ushaq pen aerozoldy gazgenerator tartylǵan. Azııalyq shegirtkege qarsy 140 gektar aýmaqty óńdeýge jer agregattary qoldanylady. Jalpy 880 gektar jerge zııankestiń tıgizgen zııany sheginen asyp túsken, - delingen habarlamada.
Bıyl óńirde 170 maman fıtosanıtarlyq zertteý júrgizedi.
Al elimizde osy kúni úıirli shegirtke túrlerine qarsy hımııalyq óńdeý 480 myń gektar aýmaqta júrgizildi.
