Qyzylordada shala týǵan nárestelerdi kútýge 2 mlrd teńgege jýyq qarjy bólindi

QYZYLORDA. KAZINFORM — Jyl basynan beri Qyzylorda oblystyq perınataldyq ortalyǵynda 357 náreste merziminen buryn dúnıege kelgen.

elimizde alǵash ret shala týǵan balalarǵa tıimdi joba iske aspaq 
Foto: QR Densaýlyq saqtaý mınıstrligi

Olardyń qatarynda qyrkúıek aıynda Aıgerim Esbolovanyń otbasynda ómirge kelgen egiz qyzdar da bar. Búginde kópbalaly ana bes balany tárbıelep otyr.

Shaqalaqtardyń týǵan kezdegi salmaǵy nebári 920 jáne 970 gramm bolǵan.
Medıtsına qyzmetkerleriniń kásibı sheberligi, táýlik boıǵy baqylaýy men qajetti emniń arqasynda sábıler birtindep salmaq qosyp jatyr.

— Qyzdarymnyń bireýi áli de jansaqtaý bóliminde dárigerlerdiń baqylaýynda. Oǵan mıyna qan quıylýyna baılanysty ota jasaldy. Ekinshi sábıim qazir janymda. Ekeýi de salmaq qosyp, jaǵdaıy jaqsaryp keledi, — deıdi Aıgerim Esbolova.

Shala týǵan nárestelerdi dúnıege kelgen sátinen bastap statsıonardan shyqqanǵa deıin kútip-baptaýdyń barlyq kezeńi Áleýmettik medıtsınalyq saqtandyrý qorynyń qarajaty esebinen qamtamasyz etiledi. Jańa týǵan náresteniń dene salmaǵyna qaraı medıtsınalyq kómek kórsetýge 2 mln-nan 4 mln teńgege deıin qarajat bólinedi.

— Ásirese, salmaǵy bir kılogramnan tómen nárestelerdi kútip-baptaý óte kúrdeli. Mundaı sábıler statsıonarda tórt aıǵa deıin jatqan ýaqytta turaqty medıtsınalyq baqylaý men arnaıy emge zárý. Bıyl oblystyq perınataldyq ortalyqqa nárestelerge medıtsınalyq kómek kórsetý jáne kútý maqsatynda Áleýmettik medıtsınalyq saqtandyrý qorynyń qarajatynan 1 mlrd 960 mln teńgeden astam qarjy bólindi, — dedi qordyń Qyzylorda oblysy boıynsha fılıalynyń bas sarapshysy Aıgúl Ahanova.

Eske salaıyq, búgin Quryltaıdaǵy Úkimet saǵatynda balalardy týǵan sátinen bastap fotosýreti arqyly sáıkestendirý tetigin engizý máselesi kóterildi.