Qyzylordada shahmattan balalar arasyndaǵy el kýbogy bastaldy
QYZYLORDA. KAZINFORM – Búgin Qyzylorda qalasynda klassıkalyq shahmattan Aralbaı Mahambetovtyń júldesine arnalǵan balalar arasyndaǵy el kýbogynyń ІІ kezeńi resmı túrde ashyldy.
Oblystyq Dene shynyqtyrý, sport jáne týrızm basqarmasy habarlaǵandaı, 17 ret uıymdastyrylǵan oı sportyna Tájikstan, Ózbekstan, Qyrǵyzstan, Reseı memleketteri jáne elimizdiń barlyq óńirinen 350-den astam sportshy qatysyp jatyr.
Saltanatty jıynda oblys ákiminiń orynbasary Shahmardan Baımanov shahmat sheberlerine sáttilik tiledi.
– Oblysta 15 myńnan astam adam shahmatpen turaqty túrde aınalysady. Olardyń arasynda oblys tarıhyndaǵy tuńǵysh FIDE sheberi, shahmattan 3 dúrkin álem chempıony, 7 dúrkin Azııa chempıony, 18 dúrkin Qazaqstan chempıony Ásel Serikbaı, jasóspirimder men jastar arasyndaǵy 17 dúrkin Qazaqstan chempıony, 3 dúrkin álem jáne Azııa chempıony Nazerke Nurǵalı, 8 dúrkin Qazaqstan chempıony, Orta Azııa chempıony Ańsat Aldııar, 2 dúrkin el chempıony jáne Azııa chempıonatynyń júldegeri Ernur Erjanuly, 2 dúrkin Qazaqstan chempıony, álem chempıonatynyń júldegeri, klassıkalyq shahmattan balalar arasyndaǵy el kýbogynyń І kezeńiniń jeńimpazy Aqyljan Meıirhanuly bar. Búgingi saıysqa qatysýshylarǵa sáttilik tileımiz, – dedi ol.
Qazaqstan kýbogynyń ІІ kezeńi 2-8 mamyr aralyǵynda ótedi.
Jaqynda Qyzylorda qalasynda Keńes Odaǵynyń Batyry Táıimbet Kómekbaevty eske alýǵa arnalǵan grek-rım kúresinen halyqaralyq týrnır máresine jetti.