Qyzylordada «Sergek» kameralary arqyly 66 mln teńgege jýyq aıyppul óndirildi

QYZYLORDA. KAZINFORM – «Sergek» kameralary ornatylǵaly qyzylordalyqtardan 66 mln teńgege jýyq aıyppul óndirildi.

Ótken jyldyń shildesinen beri Qyzylorda qalasynda pılottyq rejımdegi «Sergek» jobasy aıasynda 100 beınebaqylaý kamerasy, 10 statsıonarlyq jyldamdyq ólsheý qondyrǵysy ornatylǵan bolatyn. 

– Sonyń kómegimen jol qozǵalys erejesin buzýdyń 5241 deregi anyqtalyp, 66 mln teńgege jýyq aıyppul salyndy. Halyq arasynda «kameralardy aıyppul tóletý úshin kóptep ornatyp jatyr» degendeı áńgime júr. Shyn máninde olaı emes. Negizgi maqsat – turǵan jerimizdiń tazalyǵyn qadaǵalaý, qylmystyń aldyn alý, adamdardyń qaýipsizdigin qamtamasyz etý. Bul – álemdik tájirıbede bar úrdis. Qytaıda orta eseppen 200 mln, Amerıka men Eýropada 40-50 mln kamera bar, – dedi oblystyq polıtsııa departamenti bastyǵynyń orynbasary Sábıt Ibadýlla. 

Qazirgi kúni oblys ortalyǵynda 272 beınebaqylaý kamerasy bar. Onyń sanyn jyl sońyna deıin 1400-ge jetkizý josparlanyp otyr. 

Biz buǵan deıin jalpyǵa arnalǵan joldarmen 25 tonnadan artyq júk tasyǵan kólikterge «Sergek» arqyly aıyppul salynatynyn jazǵanbyz.