Qyzylordada sekseýil keskender jazaǵa tartyldy
QYZYLORDA. KAZINFORM — Qyzylorda oblysynda jyl basynan beri memlekettik orman qory jerindegi sekseýil aǵashyn kesýdiń 2 jaǵdaıy tirkeldi.
Oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, 2 adamǵa ákimshilik quqyqbuzýshylyq týraly kodekstiń 381-baby 1-bóliginiń 2-tarmaǵy boıynsha ákimshilik hattama toltyrylyp, jınaqtalǵan qujattar sotqa joldanǵan. Sot sheshimimen ekeýi de kináli dep tanylyp, ákimshilik jazaǵa tartyldy. Orman qoryna keltirilgen zalaldy tolyq óndirdi.
— Sonymen qatar sekseýil aǵashy bólikterin zańsyz tasymaldaý tyıylmaı tur. Jyl basynan beri osyndaı 8 derek anyqtalyp, quqyq buzýshylardyń isi ákimshilik kodekstiń 389-babymen sotta qaraldy. Nátıjesinde sot sheshimimen olarǵa ákimshilik aıyppul salyndy, — dedi ınspektsııanyń bólim basshysy Aıbek Jolaqanov.
Ekologııa jáne tabıǵı resýrstar mınıstriniń 2024 jylǵy 30 qazandaǵy № 260 buıryǵyna sáıkes elimizdiń memlekettik orman qory jerinde 2028 jyldyń 31 jeltoqsanyna deıin sekseýil kesýge tyıym salynǵan. Oǵan tek ýran ken oryndaryn qazyp shyǵaratyn aýmaq, memlekettik orman qorynyń magıstraldy qubyrlar ótetin tusy kirmeıdi.
— Oblys boıynsha memlekettik orman qorynyń jalpy aýmaǵy — 7 541 848 gektar. Memlekettik orman qorynyń 3 824 185 gektary ormanmen qamtylǵan. Onyń 90,7%-yn sekseýil alqaby alyp jatyr, — dedi Aıbek Jolaqanov.
Aıta keteıik, bıyl Aral teńiziniń qurǵaǵan ultanyndaǵy 100 gektar jerde fıtoorman-melıoratsııa jumysy atqarylady.